ಸೂಜಿ ಮೊನೆ ಹೊತ್ತ ಸಂಬಂಧದ
ಚೌಕಟ್ಟಿನ ಸಂ-ಸಾರ ದಾರವಾಗಿ
ಒಡಲಲಿ ಸೇರಿದ ಕ್ಷಣ ಶುರುವಾಗಿದೆ
ಹಸೀನಾದ ಬಾಳ ಬಟ್ಟೆ ನೇಯ್ಗೆ ಕೆಲಸ

ಗೊತ್ತಿರದ ಕೈಗಳು ಮಾಡಿದ ಸೂಜಿ
ಎಸಳು ಪ್ರೀತಿಯಿಂದ ಹೊಸೆದ ದಾರ
ಎತ್ತಣದ ಸಂಬಂಧಗಳು ಇತ್ತಣವಾಗಿ.
ಒಮ್ಮೊಮ್ಮೆ ಬೆಸೆದು ಕೊಳ್ಳಲು ಪರಿಪಾಠ ಇರಸು.

ಒಲವು ವಿಸ್ಮಯದ ರೇಖೆಗುಂಟ ಇಳಿದ
ದಾರದ ವೇಗನೆ ಗಟ್ಟಿ ಭೂಮಿಯ ಸೀಳಿ
ಬರುವ ಸೂಜಿ ತೂತಲಿ ತೂರಿಕೊಳ್ಳವ ಪರಿ
ಲಿಂಗ ಜಂಗಮ ವಾಗುವ ತತ್ವ ವಿಶೇಷ

ಎಲ್ಲಿ ನಯ ಎಲ್ಲೆಲ್ಲಿ ಬಿರುಸು
ಹೊಲೆದು ಹದ ಮಾಡಿದ ಬಟ್ಟಬಯಲು
ತೆನೆ-ಕಾಳು ಹಸಿರು ಚಿಮ್ಮಿ ಕಸೂತಿ

ಇಳೆಯಲ್ಲ ಕಳೆ ತುಂಬುವ ಕೆಲಸ ವಿಸ್ಮಯ.
ದಾರದಲಿ ಸೂಜಿಯೋ ಸೂಜಿಯಲಿ
ದಾರವೋ ಮಳೆ ಮೋಡ ನದಿ ಕಡಲು
ಒಡಲು ಬಟ್ಟೆ ಬಯಲು ಆಲಯ
ರೇಷ್ಮೆ ನೇಯ್ಗೆ ಜಾರಿ ಜಾರಿ ಬಿಚ್ಚಿಕೊಂಡ ಭವದಾರಿ ವಿನೂತನ.
*****

Latest posts by ಕಸ್ತೂರಿ ಬಾಯರಿ (see all)