ಕನ್ನಡಿಗಳು ಬೇಕು

ಬದುಕಿನುದ್ದಕ್ಕೂ ಹೆಜ್ಜೆ ಹೆಜ್ಜೆಗೂ
ಕನ್ನಡಿಗಳು ಬೇಕು!
ಎಲ್ಲ ಎಲ್ಲವುಗಳ ಪ್ರತಿಬಿಂಬಿಸಲು

ಎತ್ತರಗಳ ಅಳೆಯಲು
ಬದಲಾದ ಕನಸುಗಳ ಗುರುತಿಸಲು
ಕೈಗೆಟುಕುವುದೇ ಮುಗಿಲು? ತಿಳಿಯಲು
ದಾರಿಗೆ ಹಿಡಿದಿದೆಯೇ ಗೆದ್ದಲು?
ಇಲ್ಲವೇ ಗುರಿಯೆಂಬ ಪೂರ್ಣವಿರಾಮಕ್ಕೆ ಮಗ್ಗುಲು?
ಸೋಲುಗಳ ಮೆಟ್ಟಿ ಗೆಲುವಿನ ಮೆಟ್ಟಿಲಾಗಿಸಲು
ಕನ್ನಡಿಗಳು ಬೇಕು!
ಎಲ್ಲ ಎಲ್ಲವುಗಳ ಪ್ರತಿಬಿಂಬಿಸಲು

ಒಡೆದ ಕನಸುಗಳ ಮತ್ತೆ ಜೋಡಿಸಲು
ಮಿತಿಯೊಳಗಿರುವುದು ಬದುಕೋ
ಮಿತಿಮೀರಿದ್ದು ಬದುಕೋ ಅರ್ಥೈಸಲು
ಅರ್ಥವಾಗದೇ ಉಳಿದ
ಒಗಟುಗಳ ಬಿಡಿಸಲು
ಎತ್ತರೆತ್ತರ ಕಟ್ಟಿಕೊಂಡ ಅಹಮ್ಮಿನ
ಕೋಟೆಗಳ ಒಡೆಯಲು
ಕನ್ನಡಿಗಳು ಬೇಕು!
ಎಲ್ಲ ಎಲ್ಲವುಗಳ ಪ್ರತಿಬಿಂಬಿಸಲು

ತನಗೆ ತಾನೇ ಹೆಣೆದುಕೊಂಡ
ಭ್ರಮೆಯ ಗೂಡುಗಳ
ಒಡೆದು ಹೊರಬರಲು
ಇದ್ದಕ್ಕಿದ್ದಂತೆ ಧುತ್ತನೆ ಏಳುವ
ವ್ರಣಗಳ ಆಳ ಅಳೆಯಲು
ಕಾಣುವ ನೂರು ಮುಖಗಳ
ಕಾಣದ ಅಸಂಖ್ಯ ಭಾವಗಳ ಅರ್ಥೈಸಲು
ಆತ್ಮೀಯ ಕನ್ನಡಿಗಳು ಬೇಕು!
ಎಲ್ಲ ಎಲ್ಲವುಗಳ ಪ್ರತಿಬಿಂಬಿಸಲು
*****