ಆಲಾಪ

ಜೀವ ಮೆಲ್ಲನೆ ಒಜ್ಜೆಯಾದ ಸಂಜೆ
ಕೌನೆರಳು ಕವಿದ ಗೋಡೆಯ ಮೇಲೆ
ಗಡಿಯಾರದ ಮೆದು ಶಬ್ದಗಳು, ನೀನು
ಬರುವ ಹೆಜ್ಜೆಯ ಸಪ್ಪಳದಂತೆ, ಕೇಳಿ
ಓಣಿಯ ಕೆಂಪು ಮಣ್ಣಿನಲ್ಲಿ ಮೂಡಿದವು
ನಿನ್ನಯ ಪಾದದ ಗುರುತುಗಳು.
ನನ್ನ ಮನೆಯ ಅಂಗಳದ ಆಕಾಶದ
ನೀಲಿಯಲಿ ಅದ್ದಿ ಬೆರೆಯಲಿ ನಿನ್ನ
ಬೆರಳುಗಳು ಹೊಸ ಪ್ರೇಮ ಕಾವ್ಯ
ಅದ್ಯಮ ತೀವ್ರಭಾವ ಹೊರಳಿ ಅರಳಿ
ಎಣ್ಣೆ ಸುರಿದ ನಂದಾದೀಪ ಬೆಳಗಲಿ
ಮೂರು ಸಂಜೆಯ ಹೊತ್ತಿನಲಿ
ದೇವರು ಮನೆಯ ಕೆಂಪು ಹಾಸು ಮಿನುಗಲಿ.

ಅಲ್ಲಿ ಅಂಬರದ ನೀಲಿಯಲಿ
ನಿನ್ನ ಸಹಿ ನನ್ನ ಪ್ರೇಮ ಕಾವ್ಯಕ್ಕೆ
ತಗುಲಿದಾಗ ಚಕ್ಕನೆ ಬೆಳಗಿದವು
ಚುಕ್ಕಿಗಳು. ಚಂದ್ರ ಮುನಿಸಿಕೊಂಡು ನನ್ನೊಡನೆ.
ಅವನಿಗೇನು ಗೊತ್ತು ತಿಂಗಳಲ್ಲಿ
ಹದಿನೈದು ದಿವಸಗಳು ನಾ ಅವನ
ಬೆಳದಿಂಗಳ ಹಾಲು ಮೈ ಮನಸ್ಸು.
ಸ್ನಾನ ಮಾಡಿ ಪುಳಕಗೊಂಡು ಕವಿತೆಗಳ ಬರೆಯುತ್ತೇನೆಂದು.
*****