ಎಲ್ಲಿಂದೆಲ್ಲಿಂದಲೋ ತೇಕುತ್ತಾ
ಬಂದು ನಿಲ್ಲುವ ಗಾಡಿ
ಮತ್ತೆಲ್ಲಿಗೋ ಅದರ ಪಯಣ
ಯಾರೋ ಇಳಿಯುವವರು
ಮತ್ತಿನ್ಯಾರೋ ಏರುವವರು
ಹಸಿದವರು, ಬಾಯಾರಿದವರು.
ಕೊಳ್ಳುವವರು, ಮಾರುವವರು
ಗಜಿಬಿಜಿ ಗೊಂದಲ
ಸತ್ತವನಿಗೆ ಫಕ್ಕನೆ
ಜೀವ ಬಂದಂತೆ ಎಲ್ಲಾ!
ಗಾಡಿ ಹೊಟ್ಟೆಗೊಂದಿಷ್ಟು ನೀರು ಬಸಿದು
ಗಾಡಿ ಅಂಗಗಳ ಸರಿ-ಬೆಸ ಲೆಕ್ಕಾಚಾರ
ಅವಿರತ ಪಯಣದ ಮಧ್ಯೆ
ಒಂದಿಷ್ಟು ಆರಾಮ
ಕಣ್ಗೆ ಬೇಕೆನಿಸುವ ತಿಂಡಿ
ಸಾಮಾನಿನವನ ತಳ್ಳುಬಂಡಿ
ಏನೋ ಕೂಗುವ
ಮತ್ತೇನೋ ಬಡಬಡಿಸುವ
ಪಿಚಕ್ಕನೆ ಉಗಿಯುವವ
ಯಾವುದೋ ಲೋಕದಲ್ಲಿರುವವನಂತೆ
ಸಿಗರೇಟಿನ ಹೊಗೆ ಬಿಡುತ್ತಾ
ನಿಂತ ಸತ್ತ ಮುಖದವ
ಇಲ್ಲಿ ನಾಳೆಗಳಿಲ್ಲ
ಇಂದು ಈ ಘಳಿಗೆಯಷ್ಟೇ ಜೀವಂತ!
ಚಿತ್ರ, ವಿಚಿತ್ರ ವೇಷದ
ಚಿತ್ರ, ವಿಚಿತ್ರ ಭಾಷೆಯ
ಅನ್ಯಗ್ರಹ ಜೀವಿಗಳೆನಿಸುವ
ವಿಚಿತ್ರ ಮುಖಗಳ ಮುಖಾಮುಖಿ ಅರೆಘಳಿಗೆ
ಗಂಟೆ ಬಾರಿಸಿದೊಡನೆ
ಎಲ್ಲಾ ಮುಗಿದಂತೆ ತರಾತುರಿ
ಅತ್ತಿಂದಿತ್ತ ಇತ್ತಿಂದತ್ತ ಗಡಿಬಿಡಿ ಓಡಾಟ
ಮತ್ತೆ ಗಬಗಬನೆ ಹೊಟ್ಟೆಯೊಳಕ್ಕೆ
ಎಲ್ಲರ ತುಂಬಿ
ತೇಕುತ್ತಾ ತೆವಳುತ್ತಾ ಮೆಲ್ಲಗೆ
ಹೊರಡುತ್ತದೆ ಗಾಡಿ
ಇತ್ತ ಎಲ್ಲಾ ಒಮ್ಮೆಗೇ ಸತ್ತಂತಾಗಿ
ನಿಶ್ಯಬ್ಧ, ಸ್ತಬ್ಧ!
*****
