ಅಳುವು ನಿನ್ನದು ನಗುವು ನಿನ್ನದು
ನೋವು ಸುಖಗಳು ನಿನ್ನವು
ಹೊಳೆದು ಅಳಿಯುವ ಚೆಲುವು ನಿನ್ನದು
ತಾಳಿ ಬಾಳುವ ಒಲುಮೆಯು || ೧ ||
ಲಾಭ ನಿನ್ನದೆ ನಷ್ಟ ನಿನ್ನದೆ
ನನ್ನದೆನ್ನುತ ಉಬ್ಬುವೆ
ಕಾಮ ನಿನ್ನದೆ ಪ್ರೇಮ ನಿನ್ನದೆ
ಏರಿಳಿವುಗಳ ತಬ್ಬುವೆ || ೨ ||
ನೀನೆ ಕೊಟ್ಟುದ ನೀನೇ ಪಡೆಯುವಿ
ನೀನೆ ಹುಟ್ಟಿಸಿ ಕೊಲ್ಲುವಿ
ನಿನ್ನದೆಲ್ಲವ ನನ್ನದೆಂಬುವ
ತಮದ ಕೆಸರಲಿ ತಳ್ಳುವಿ || ೩ ||
ಮೈಯ ಯೌವನ ಅಂಗ ಸೌಷ್ಟವ
ರೂಪ ಬೇದವ ಅರಿಯೆನು
ಎಲ್ಲ ವಸ್ತುಗಳಲ್ಲಿ ನನ್ನದು
ಮುದ್ರೆ ಅಂಟಿಸಿ ಅಳುವೆನು || ೪ ||
ನನ್ನ ಬದುಕಿನ ನೂರು ಮುಖಗಳು
ನಿನ್ನವಾಗಲಿ ಒಡೆಯನೇ
ನನ್ನ ಸುತ್ತಲ ಕೋಟಿ ಮುಖದಲಿ
ನಿನ್ನ ಕಾಣುತ ಪಡೆಯೆನೇ || ೫ ||
ನನ್ನ ದೇಹವು ನಿನ್ನ ಲೀಲೆಗೆ
ರಂಗವಾಗಲಿ ಭವ್ಯವು
ನನ್ನ ಮನಮತಿ ನಿನ್ನ ಕುರುಹಿನ
ಶಕ್ತಿಯಾಗಲಿ ನವ್ಯವು || ೬ ||
*****
