ಮುಖವಾಡಗಳ ಕವಿಗೆ

ಸಾಕು ನಿಲ್ಲಿಸು
ನಾಗರಿಕ ಭಾಷೆಯಲ್ಲಿ ಮಾತಾಡು
ಮನುಷ್ಯರ ಹಾಗೆ ಮಾತಾಡು
ಪ್ರತಿಮೆ ಪ್ರತೀಕ ಪ್ರಾಕಾರ ಎಂದು
ಮೇಜಿಕ್ಕು ಕಾವ್ಯ ಗೀಚುತ್ತೀಯಾ
ಆಮೇಲೆ ಲಾಜಿಕ್ಕು ಬೊಗಳುತ್ತೀಯಾ
ಸ್ವಂತ ಗೋಷ್ಟಿಗಳಲ್ಲಿ ಚೇಷ್ಟೆ ಮಾಡುತ್ತೀಯಾ
ಗುಂಪುಗಾರಿಕೆ ನಡೆಸುತ್ತೀಯಾ
ಹೆಚ್ಚು ಹಾರಾಡಬೇಡ
ಟೈಟ್ ಪ್ಯಾಂಟುಧಾರಿ ನವ್ಯದ ಮರಿ-
ತರಕಾರಿ ತೋಟದ ಕ್ರಿಮಿ-ತಕರಾರುಕಾರಿ
ವಿನಾಶಕಾರಿ ದುರಹಂಕಾರಿ ಬೀದಿಭಿಕಾರಿ

ಬೀದಿಯ ಮಧ್ಯೆ ನಿಂತು ಭಾಷಣ ಮಾಡಿ
ಹಳೆ ಹುಲಿಗಳನ್ನು ಇಲಿ ಇಲಿ ಎಂದು ಕೂಗಿ
ಜಗಳಕ್ಕೆ ಕರೆದು ತಮಾಷೆ ನೋಡಿ-
ಅಲ್ಲಾ, ಏನಾಗಿದೆ ನಿನಗೇ ಅಂತ ?
ಸದಾ ಯಾಕೆ ಕಿರಿಕಿರಿ ಮಾಡ್ತೀಯಾ ?
ಸುಮ್ಮನೆ ಪಾಪದವರ ಹಾಗೆ, ಎಲ್ಲರ ಹಾಗೆ
ಇರಬಾರದೇ ನಿನಗೆ ನಾವು ಹೇಳಿದ ಹಾಗೆ ?
ಅಲ್ಲಾ, ಗುಟ್ಟಿನಲ್ಲಿ ಹೇಳಿಬಿಡಪ್ಪಾ;
ಸುಮ್ಮನಿರಬೇಕಾದರೆ ನಿನಗೆ ಏನು ಬೇಕೂಂತ.
*****