ಸೂರ್ಯ ಹೊರಳಿದ ಕಿಟಕಿಯಲಿ
ಅವನ ಆಕೃತಿ ಸರಿದು ಕೌ ನೆರಳು
ನೆನಪಿನ ಬೆರಳುಗಳು ಮೀಟಿ
ನಡುವೆ ಅರಳಿದೆ ಜೀವ ವಿಕಾಸ
ಕಾಪಿಡುವ ಕೈಗಳು ಬಿಗಿದಪ್ಪಿವೆ
ನೀಲಬಾನು ಒಂದುಗೂಡಿದ ಘನ
ಎಲ್ಲಾ ನದಿಗಳು ಹರಿದು ಸೇರಿವೆ
ಕಡಲು ಚಿಮ್ಮಿವೆ ಜಗದಗಲ ತೆರೆಗಳ
ಹೊಸ ಹಾಡು ಹೊಸ ರಾಗ
ಹೊರ ಹೊಮ್ಮಿದ ಹಕ್ಕೀ ಚಿಕ್ಕೀ ಹಾಡು
ಅಡಿಗಳಿಗೆ ಚಿಮ್ಮಿದೆ ನಿರಾಂತಕ ಹಸಿರು
ರಾಗಗಳ ಮಾಲಿಕೆ ಹೊತ್ತ ತಾಯಿ ಭೈರವಿ.
ಮಳೆ ಹೊಯ್ಯುತಿದೆ ಭೂಮಿ ತೊಯ್ಯುತಿದೆ
ಬಯಲ ತುಂಬ ಭದ್ರ ಕನಸುಗಳು
ಬೀಜಗಳು ಹರಡಿ ಜಾಡು ಹಿಡಿದ ನಡುಗೆ
ಪಂಚಭೂತಗಳ ಜೀವ ಮಿಸುಕಾಡಿದೆ.
ಯಾವ ಬಣ್ಣ ವಾಸನೆ ರುಚಿ ಇಲ್ಲ
ಸಾವಿನ ಮನೆಯ ನೆರಳಿಗೆ
ಬೆಳಕಿನ ಸವಾರಿ ಸೂರ್ಯ ಸವಾಲು
ಹುಟ್ಟಿಗೆ ದಾಖಲೆ ಇಟ್ಟವರಿಲ್ಲ.
*****
