ಓ ಈಡಿಪಸ್ ನಿನ್ನೆದೆಂತಹ ಬದುಕು
ಅಮಾನುಷ ವಿಧಿಬರಹಕೆ ಈಡಾಗಿ
ಅರಿಯದೆ ಹಿಂದೆಂದೂ ನಡೆಯದಿದ್ದ
ಮುಂದೆಂದೂ ನಡೆಯದಿರುವ
ಘನಘೋರ ದುರಂತಕ್ಕೆ ಬಲಿಯಾದೆ
ನವಮಾಸಗಳು ತನ್ನೊಡಲಲಿ
ನಿನ್ನನಿರಿಸಿಕೊಂಡ ಹೆತ್ತವಳಿಗೆ
ಮಾಲೆ ಹಾಕಿ ಅವಳೊಡೆಯನಾದೆ
ಅವಳ ನಗ್ನತೆಯಲಿ ಸುಖವುಂಡು
ನೀ ಸೃಷ್ಟಿಯಾದಲ್ಲಿಯೇ ನಿನ್ನ ಭ್ರೂಣವನ್ನೂ
ಸೃಷ್ಟಿಸಿ ಹೇಯದಾಖಲೆಯ ಪಿತನಾದೆ
ದುರ್ದೈವ ಈಡಿಪಸ್ ಗೊತ್ತಿತ್ತೇ
ನಿನ್ನೆದೆಂತಹ ಹೀನಬದುಕೆಂದು
ಯುಗ ಯುಗ ಕಳೆದರೂ
ಸೂರ್ಯ ಚಂದ್ರರಿರುವ ತನಕವೂ
ನಿನ್ಹೆಸರು ಅಳಿಯದೆಂದು
ಹೆತ್ತವಳನ್ನೇ ಭೋಗಿಸಿದ ಕೀರ್ತಿ ನಿನ್ನದೆಂದು
ಓ ಈಡಿಪಸ್ ಘನ ಘೋರ ಸತ್ಯಕೆ
ಬೆಚ್ಚಿ, ಜನನಿಯ ನಗ್ನತೆ ಕಂಡ
ಈ ಕಣ್ಣುಗಳಿರಬಾರದೆಂದು ಕುರುಡಾದೆ
ಆದರೇನು ಮರೆಯಾದಿತೇ ಆ ದೃಶ್ಯ
ನಿನ್ನ ಅಂತರಂಗದ ಅಂತರಾಳದಲಿ
ಅಮ್ಮ ಎಂದವಳ ಕರೆಯಬಲ್ಲೆಯ?
*****
