ಕ್ಲಿಂಟನ್

“ಪಾಪ! ಅಂವ ಮಾಡಬಾರದ್ದ
ತಪ್ಪೇಽನ ಮಾಡ್ಯಾನ
ಮನುಷ್ಯಾ ಮಾಡ್ದ ಏನ್
ಹೆಣಾ ಮಾಡ್ತತಿ”
“ಮೋನಿ ಅಷ್ಟ ಮೋಡೀಽನ ಮಾಡ್ಯಾಳ
ಅಂದ ಮ್ಯಾಲ ಅವಂದಽ ತಪ್ಪಂತ
ಹೆಂಗಂತೀರಿ, – ಆಕಿಂದನೂ ತಪ್ಪಽ
ಹೌದಲ್ಲೋ ಮತ್ತಽ”

“ಅಂವ ಪ್ರೆಸಿಡೆಂಟ್ ಆದ್ರ ಏನಾಽತು
ಮನಷ್ಯಾನ ಹೌದಲ್ಲೋ ಮತ್ತಽಽ”
“ಆಗಿದ್ದಾಗಿ ಹೋತ್ರಪಾ
ಅದನಽ ದೊಡ್ದದ ಮಾಡಬಾರದ
ನಿಮಗಽ ಬ್ಯಾರೆ ಕೆಲಸ – ಬಗಸಿ ಇಲ್ಲೇನು,
ಟಿ.ವಿ. ದಾಗ ಅವ್ರು ಹೇಳಿದ್ರು
ಪೇಪರದಾಗ ನೀವು ಓದಿದ್ರಿ –
ದೊಽಡ್ಡ ಮಾತಾಡಕ್ಹತ್ತಾರ”

“ನಿಮಗ ಏನಽರ ಗೊತ್ತತ್ತೇನ
ಲವ್ವ ಗಿವ್ವು ( love, give)
ಅಂದರ ಏನಂತ –
‘ಹೆಂಡತಿ ಅದಾಽಳಲ್ಲ’
ಆಕಿಽ ಕಿಮ್ಮತ್ತು ಆಕೀಗೆ ಇದ್ದ ಇರ್‍ತತಿ
ಈ ಮೋನಿ ಇದ್ರ ಇರವಳ್ಯಾಕ
ಅದರ ಕಿಮ್ಮತ್ತು ಅದಕ ಇದ್ದಽ ಇರತತಿ
ಇಂವ ಆಟಽ ತುಡುಗು ಬೆಣ್ಣಿ
ತಿಣ್ಣಾಕ ಹೋಗಿ ಸಿಗಬಾರ್‍ದಿತ್ತು, ಸಿಕ್ಕ
ಇನ್ನೇನ ಮಾಡಕ ಆಗ್ತತಿ
ಇಂವು ಆಟಽ ಸುದ್ದಿ ಆಗೋದಕ್ಕಿಂತ
ಮೊದಲ ಹೇಳಬೇಕಾಗಿತ್ತು ಹೇಳಲಿಲ್ಲ
ಆಮೇಲರೆಽ ಆಟ ‘ಹೂಂ’ ಅಂದೀಽರ
ಮುಗಿತಿತ್ತು”

“ಅಬರು ಉಳಿಸಿಕೊಳ್ಯಾಕ ಹೋಗ್ಯಾನ
ಖರೇ ಆಕಿ ಬಿಡತಾಳೇಽನ
ಅರವಿ ಅಂಚಡಿ ಸಹಿತ ಧಾಖಲ ಮಾಡಿ
ಅಂವ ಹ್ಯಾಂಗ ಪ್ರೀತಿಸ್ತಿದ್ದ ಅನ್ನೋದು
ಎದಿ ಉಬ್ಬುಬ್ಬಿಸಿ ಹೇಳಿ
ತನ್ನ ಹಳೇಽ ಸೇಡ ಏನೇನೋ
ಇರಬೇಕಽ ತೀರಿಸಿಕೊಂಡಬಿಟ್ಲ.
ಈಗ ಇಂವನ ಮುಖಾ
ಇಂಗ ತಿಂದ ಮಂಗ್ಯಾನ ಹಂಗ ಆಗೇತಿ
ನೋಡಿದ್ರಿಲ್ಲೋ ಟಿ.ವಿ.ದಾಗ”

“ಹಿಂಗಽ ಮನಿ ವಿಷಯ
ಬೀದಿಗೆ ಎಳಿಬಾರ್‍ದಿತ್ತು’
“ಆಗಿದ್ದಾಗಿಹೋತು ಬಿಡ್ರಪ್ಪ ಇನ್ನ
ಹೊಳ್ಳಿಽ ಹೊಳ್ಳಿಽ ಅದಽ ಮಾತಾಡವ್ರು
ಅಂವ ದೇಶಕ್ಕೆ ಏನೇನ
ಸಾಧನಾ ಮಾಡ್ಯಾನಽ ಬಿಟ್ಟಾನಽ
ಆನ್ನೋದಟ ಮಾತಾಡ್ರಿ”
*****

ಕೀಲಿಕರಣ : ಎಂ ಎನ್ ಎಸ್ ರಾವ್

Leave a Reply

 Click this button or press Ctrl+G to toggle between Kannada and English

Your email address will not be published. Required fields are marked *

Previous post ಆರ್ಟ್ಸ್ ಕಾಲೇಜಿನ ಹಾದಿಯಲ್ಲಿ
Next post ಕೊಂಡಿ

ಸಣ್ಣ ಕತೆ