ಛಂದವನರಿತು, ತಂತ್ರವ ಬಳಸುವದೇ ಬಂಧ.
ಇದೆ ಬಾಳಿನ ಸಂಬಂಧ.
ಬೇರಿಲ್ಲವೊ ಮುಕ್ತಿಗೆ ಯುಕ್ತಿ.
ವಿಭಕ್ತಿಯಲ್ಲಿಯೆ ವಾಕ್ಯದ ಭಕ್ತಿ
ಅದು ಭಗವಂತನ ಶಕ್ತಿ
ಬಾ ಬಂಧು
ನಾನೂ ನೀನೂ ಒಂದು
ಬದುಕುವರೇ ಕೊಂದು?
ಸಾವಾರಿಗೆ ಇಲ್ಲ?
ರೂಪ ವಿಕಾರವು ಹಲವು ಪ್ರಕಾರ
ಅಳಿವಿನತ್ತ ಬೆಳೆಯುವದೊಂದಂದ
ಉಳಿವಿನಲಿದೆ ಇರವಿನ ಅರಿನಿನ ಚೆಂದ
ಕಟ್ಟಿಗೆ ಬೆದರಿ, ಮುರಿಯದಿರಣ್ಣ.
ಮೈಮುರಿದೇಳುತ್ತಿದೆ ಭೂಮಿಯ ಬಣ್ಣ.
ಕಾಣದೆ ಕಣ್ಣ?
ಹಸಿರಲ್ಲಡಗಿದೆ ನೆಲದೆದೆ ಹಸಿರು.
ಬಾನಿನ ನೀಲಿಯೊಳಿಳಿದಿದೆ ರವಿಯುಸಿರು
ಆ ಕಾವಿನಲೇ ಹುಟ್ಟಿದೆ ಕಾಮ,
ರತಿಯಿಲ್ಲದೆ ಎಲ್ಲಿದೆ ಪ್ರೇಮ?
ಶಿವಗೌರಿಯ ನೇಮ.
ಸತಿಯಿಲ್ಲದೆ ಪತಿಯಿಲ್ಲ,
ಸಂತತಿಯಾ ಗತಿಯಿಲ್ಲ.
ಬಂಧದೊಳಿದೆ ಸಂಬಂಧ
ಸಹಜೀವನ ಸಖಭಾವನ
ಇದೆ ಸಭ್ಯರ ರೀತಿ
ಕುಂಟಲಿಯರ ಕುಟಿಲತೆಯಲಿ
ಮೂಡುತ್ತಿದೆ ಭೀತಿ.
ಹೃದಯಕ್ಕೆದೆಯನು ತೆರೆವುದು
ನಿರ್ಮಲತೆಯ ನೀತಿ
ಛಂದವು ಬಂಧವು ಕೂಡಿದೆ
ಮುಕ್ತತೆಯೂ ಗೀತಿ.
ಸಮತೂಕತೆ ಎರಡಾಗಿದೆ
ಒಂದಿರುವಾ ಜಾತಿ
ಕರಡಾಗಿದೆ ಬರಡಾಗಿದೆ
ರಸರಹಿತ ಪ್ರೀತಿ.
*****
