ಸುಮ್ಮನೇಕೆನ್ನನೆಲೆ ವಿಧಿಯೆ ಕಾಡಿಸುವೆ?

ಸುಮ್ಮನೇಕೆನ್ನನೆಲೆ ವಿಧಿಯೆ ಕಾಡಿಸುವೆ?-
ಬೇಡಿದುದ ಕೊಡೆ, ಬೇಡದುದನಾಯ್ದು ಕೊಡುವೆ!
ಆರದುದನಾಪೆನೆಂದೇಕೆ ತಡಬಡುವೆ?
ಕೇಳುವೊಡನೀವೆನೆಂದೇಕ ಬೇಡಿಸುವೆ? ೪

ಆದೊಡಂ ಕೇಳೆನಗೆ ನಿನ್ನಿಂದು ಬೇಡ-
ಅವಳನೆನ್ನಿಂದೊಯಿದ ಇಂದೆನಗೆ ಬೇಕೆ?
ಇನ್ನವಳ ಕಾಣಿಸದ ನಾಳೆಯಕಟೇಕೆ?
ಅವಳಿದ್ದ ನಿನ್ನೆ ಸಾಕೆನಗದಂ ನೀಡ! ೮

೧ಇಂದಿನಳುವೆಯ ನುಗ್ಗುತೆದೆ ನಾಳೆಯತ್ತಂ
ಸುಖದಿ ಹೊರಮೊಗಗೊಂಡು ಹರಿಯಲದು ನೇರೆ,
ಅಳಲೊಳಿಳಿಮೊಗಮಾಗಲಾಸೆ ಮರಳುತ್ತಂ
ಹಾಯ್ವುದಿಂದನು ನಿನ್ನೆಗಳ ಕಡಲ ಸೇರೆ ೧೨

ಆದುದರಿನಾಪಡಿದೊ ಹಿಂದಿರುಗಿಸೆನ್ನ,
ನಿನ್ನೆಗಯ್ದಿಸು-ಬೇರೆ ನಾನೆರೆಯೆ ನಿನ್ನ
*****
೧ ಅಳುವೆ=ಹೊಳೆ ಕಡಲನ್ನು ಸೇರುವ ಬಾಯಿ (bar)