ಏಳು ಕಂದಾ ಮುದ್ದು ಕಂದಾ

ಏಳು ಕಂದಾ ಮುದ್ದು ಕಂದಾ
ತಂದೆ ಶ್ರೀಗುರು ಕರೆದನು
ಮಕ್ಕಳಾಟವು ಸಾಕು ಮಗುವೆ
ವ್ಯರ್ಥ ಸಾಕು ಎಂದನು

ಕೈಯ ಹಿಡಿದನು ಕರುಣೆ ಮಿಡಿದನು
ಮೇಲು ಮೇಲಕೆ ಕರೆದನು
ಮೇಲು ಮೇಲಿನ ಮೇಲು ಮಠದಾ
ಪ್ರೇಮ ಪಾಠವ ಕೊಟ್ಟನು

ಮಾತು ಜ್ಯೋತಿರ್ಲಿಂಗವಾಗಲಿ
ಮನವು ಆರತಿ ಬೆಳಗಲಿ
ಸೇವೆ ಸುಂದರ ಕಮಲವಾಗಲಿ
ತೇರು ನವಯುಗ ಸೇರಲಿ

ನಿರ್ಮಲಾತ್ಮರೆ ಲೋಕ ಪೂಜ್ಯರೆ
ಶರಣ ಗಾನವು ತುಂಬಲಿ
ಕಾಯ ಕಾಂಚನ ಕಮಲ ಅರಳಲಿ
ವಿಶ್ವ ಜಂಗಮವಾಗಲಿ

ಗುರುವೆ ಲಿಂಗವು ಲಿಂಗ ಜಂಗಮ
ಶರಣ ಸಂಗಮ ಅನುಪಮ
ಭಕ್ತ ಶಕ್ತಿಗೆ ಜ್ಞಾನ ಶಕ್ತಿಯು
ತುಂಬಿ ಬಂದರೆ ನಿರುಪಮ
*****