ಕಾಯೋ ತಂದೆಯೆ ಕಂದನ ಸದಯ
ಕನವರಿಸುತಲಿದೆ ನನ್ನೀ ಹೃದಯಾ || ಪ ||
ಕಾಲಿವು ಕೆಸರಲಿ ಹೂತಿವೆ ಜೀಯಾ
ತಲೆಯಿದು ಮುಗಿಲಿಗೆ ನೋಡುತಿದೆ
ಅರಳಿದ ಸುಮಗಳು ಅಣಕಿಪವೆನ್ನ
ಹಾರುವ ಹಕ್ಕಿಯು ಕರೆಯುತಿದೆ || ೧ ||
ಗಗನ ಕುಸುಮಗಳು ಕನಸಾಗುತಿವೆ
ಭೂಮಿಯ ಬವಣೆಯು ಹಿಂಡಿದೆ ಹರಣಾ
ಚೇತನ ಲತೆಯದು ಕಡುಬಾಡುತಿದೆ
ಯಾತನೆ ಬೆಂಕಿಯು ಕರೆದಿದೆ ಮರಣಾ || ೨ ||
ಆಸೆ ಚಿಕ್ಕೆಗಳು ಮೈಗರೆಯುತಿವೆ
ನಂಬಿಕೆ ನಾವೆಯು ಹೊಯ್ದಾಡುತಿದೆ
ಹಂಬಲ ಹಸಿವದು ಹಿಂಗದು ತಂದೇ
ನಿನ್ನಯ ಕಾಣದೆ ಬಳಲಿದೆ ಬೆಂದೆ || ೩ ||
ತಪ್ಪು ಹೆಜ್ಜೆಗಳು ಕತ್ತಲಿನೆಡೆಗೆ
ಸಾಗಿವೆ ಸುತ್ತಲು ಬಲೆ ಹೆಣೆದಿರಲು
ಕರೆವವರಿಲ್ಲದೆ ನಡೆಸುವವರಿಲ್ಲದೆ
ಕರೆದಿಹೆ ದೇವಾ ಹಗಲೂ ಇರುಳು || ೪ ||
*****
