ಏನೇ ಬಂದರೂ

ಏನೇ ಬಂದರೂ
ಎದುರುಸಿ ಸಾಗುವ
ಆತ್ಮವಿಶ್ವಾಸವ ನೀಡೆನಗೆ ದೇವಾ|
ಕರುಣಿಸಿ ನಿನ್ನ ಕರುಣೆಯ
ಕವಚವ ಸದಾ ಕಾಯೆನ್ನ ಜೀವ||

ಹಸಿದ ಹೆಬ್ಬುಲಿ ಗರ್ಜಿಸಿದಂತೆ
ಗರ್ಜಿಸಲಿ ಬಾಳ ಕೆಡುಕು|
ಕಡಲುಬ್ಬರಿಸಿ ಅಬ್ಬರಿಸುವಂತೆ
ಅಬ್ಬರಿಸಲಿ ಬದುಕು|
ಕಾರ್ಮೋಡ ಕವಿದು ಮಿಂಚು,
ಗುಡುಗು, ಬರಸಿಡಿಲುಗಳು
ಆರ್ಭಟಿಸುವಂತೆ ಆರ್ಭಟಿಸಲಿ ಜೀವನ|
ನಿನ್ನೊಂದು ಕರುಣೆಯ ಕಿರಣ
ಆಶಾಕಿರಣವಾಗಿರಲು ಭಯಪಡೆನು ನಾನು||

ಸಾವಿಗೆದರದೆ, ಅಧರ್ಮಕ್ಕಂಜದೆ,
ಕಪಟ ಮೋಸಗಳಿಗೆ ಎದೆಗುಂದದೆ
ಹೋರಾಡುವುದ ಕಲಿಸೆನಗೆ|
ಅನ್ಯಾಯಿಗಳ ನಿರ್ದಯದೆ
ಹುಟ್ಟಡಗಿಸೆ ಶಕ್ತಿ ನೀಡೆನಗೆ|
ಗುರಿ ಇರಿಸು, ಅದ ನೆರವೇರಿಸೆ
ಹುರಿದುಂಬಿಸು, ಆಶೀರ್ವದಿಸು
ಜಯದ ಹಿಂದೆ ಜಯಗೊಳಿಸು
ನೀ ಸದಾ ಇಲ್ಲಿ ವಿಜೃಂಭಿಸು||
*****