ಅರುಣನುದಯನೆ ನಿನ್ನ

ಅರುಣನುದಯನೆ ನಿನ್ನ
ಕರುಣ ಕಮಲದಿಂದಲಿ
ಜಗದ ಜೀವ ಚೇತನವಾಗಿ
ಸುಂದರ ರೂಪತಳೆದು
ತೋರುತಿಹುದು ನಿತ್ಯ ಸತತ||

ದಿನದ ಪ್ರತಿಘಳಿಗೆಯನು
ಬಿಡದೆ ನೀ ಬೆಳಗಿ ಬೆಳೆಯುತ
ಲೋಕವನುದ್ದರಿಸುತಿರುವೆ|
ಬೆಳೆದು ಬೆಳೆದಂತೆ
ಸವೆದು ಇತರರಿಗೆ
ಚಿಕ್ಕವನಾಗಿರುವಂತೆ ತೋರಿ
ಮಾದರಿಯಾಗಿರುವೆ||

ನೀ ಏನನು ಬಯಸದಲೆ
ಎಲ್ಲಾ ನಮಗಾಗಿ ಬಗೆಬಗೆ ಕಿರಣ
ಕಾಂತಿಗಳ ಹೊರಸೂಸುತಿರುವೆ|
ಕೋಟಿ ವಂದನೆ ನಿನಗೆ
ತಾ ಸುಡುತಲಿ ಜಗವ ಬೆಳಗುತಿರುವೆ|
ನಿನ್ನೊಬ್ಬನಿಗೇ ತಿಳಿದಿದೆ ಈ ವಸುಂಧರೆಯ
ಸಂಪೂರ್ಣ ಸತ್ಯ‌ಇತಿಹಾಸ ಪುರಾವೆ||

ನೀನೋಬ್ಬನೇ ಕಂಡಿರುವೆ ನಮ್ಮೆಲ್ಲ
ಪೂರ್ವಜರ ಸ್ಥಿತಿ ಗತಿ ಮತಿಯನು
ನೀನೊಬ್ಬನೇ ದರ್ಶಿಸಿರುವೆ ಇಲ್ಲಿ ನಡೆದಾಡಿದ
ದೇವಾದಿ ದೇವರುಗಳನು|
ನಿನ್ನಿಂದಲಾಗಿ ಚಂದ್ರಮನು ಹುಣ್ಣಿಮೆಯಾಗಿ
ಮೈತಳೆದು ಮಿನುಗುವನು
ನಿನ್ನಂತ ಪುಣ್ಯದೇವನು ಯಾರಿಹರು
ನಿನಗೆ ನೀನೆ ಸರಿಸಾಟಿಯು|
ಪ್ರತಿ ಮುಂಜಾನೆ ಅರ್ಪಿಸುವೆ ನಿನಗೆ
ನನ್ನದೊಂದು ಅರ್ಘ್ಯ ನಮಸ್ಕಾರವು ||
*****