ಗಾಳಿಪಟ

ನಿನ್ನ ಬಾನಂಗಳದಲಿ ನನ್ನ ಗಾಳಿಪಟ
ತೇಲಲಿ ನೀಲಿ ಅಂಬರದಲಿ ಕನಸುಗಳು
ಚಿಕ್ಕಿಗಳು ಮಿನುಗಲಿ, ನಿನ್ನೆತ್ತರ
ಆಕಾಶದಲಿ ನನ್ನಾತ್ಮದ ಕನವರಿಕೆ
ಹಕ್ಕಿ ರೆಕ್ಕೆ ಬಿಚ್ಚಿ ಬೀಸಿ ಹಾರಾಡಲಿ
ಇಳೆಯ ಅಚ್ಚರಿಯ ಘನತೆಯಲಿ.

ನೀ ಎಂಬ ಮಳೆ ಹನಿಹನಿಯಾಗಿ
ಇಂಚರಿಸಲಿ ನನ್ನ ಮನಸ್ಸಿನಲಿ
ಅಲ್ಲಿ ಪ್ರೀತಿಯ ಹೊಳೆ ಹರಿದು
ನೀಲಿಯಾಗಲಿ ಕಡಲು ಒಂದಾದ
ಭಾವಮೋಡಗಳು ತೇಲಲಿ
ನಿನ್ನೊಡಲಿನ ಹರವಿನಲಿ.

ನೀ ಸುಂದರ ಹನಿತಂಪು
ಚಿಗುರಿ ಹಸಿರು ಹಾಸಲಿ ಈ
ಬಯಲಿನಲಿ ಬೀಜ ಅಂಕುರವಾಗಿ
ಒಡಲಿಗೂ ಕಡಲಿಗೂ ಮುತ್ತು ಅರಳಲಿ
ಸ್ವಚ್ಛಂದ ಜೀವ ಭಾವ ನಿರಾಳದಲಿ
ಬೆಳಕ ಕಿರಣಗಳ ಒಡಲಿನಲಿ.

ಬೆಳಕಿನ ಗಾಳಿಯ ದೀಪವಾದರೆ ನೀ
ಹೊಳೆ ಹೊಳೆವ ನದಿತಾರೆಯಾಗುವೆನಾ
ದಂಡೆ ದಂಡೆಯಲಿ ಮೆಲ್ಲಗೆ ಅರಳಿ
ಘಮ್ಮೆಂದು ಸೂಸಿ ಸೌರಭ ಪ್ರೇಮಕಾವ್ಯ
ಮುಗಿಲ ಕನಸಿಗೆ ಬಂಧವಾಗುವ
ಹುಟ್ಟು ಸಾವಿನ ಅನಂತತೆಯ ಧ್ಯಾನದಲಿ.
*****