ತುಂಬಿದ ಕಪ್ಪನೆ ನೇರಿಳೆಯಂತೆ
ಮಿರಿ ಮಿರಿ ಮಿಂಚುವ ಮಗುವೊಂದು
ಚಿಂದಿಯನುಟ್ಟಿದೆ, ಚರಂಡಿ ಬದಿಗೆ
ಮಣ್ಣಾಡುತ್ತಿದೆ ತಾನೊಂದೆ
ದಾರಿಯ ಎರಡೂ ದಿಕ್ಕಿಗೆ ವಾಹನ
ಓಡಿವೆ ಚೀರಿವೆ ಹಾರನ್ನು,
ಮಗುವಿನ ಬದಿಗೇ ಭರ್ರನೆ ಸಾಗಿವೆ
ನೋಡದಂತೆ ಆ ಮಗುವನ್ನು!
ಅರೆ ಕಟ್ಟಿದ ಮನೆ, ಅಲ್ಲೇ ತಾಯಿ
ಕಲ್ಲನು ಹೊರುತಿರಬಹುದೇನೋ!
ರಾತ್ರಿಯ ಕೂಳಿನ ಎರಡೇ ತುತ್ತಿಗೆ
ದುಡಿಯುವ ಕರ್ಮದ ಕಥೆ ಏನೋ !
ಬಗಲಿನ ಮಗುವನು ನೆಲಕ್ಕೆ ಚೆಲ್ಲಿ
ಸೈಜುಗಲ್ಲ ಸೊಂಟದೊಳಿಟ್ಟು
ದುಡಿಯುವ ತಾಯಿ ಹೊಟ್ಟೆಯ ಪಾಡಿಗೆ
ಕರುಳಿನ ಕೂಗನು ಅದುಮಿಟ್ಟು!
ಒಡಲಿನ ಕೂಗಿನ ಅಬ್ಬರ ತಣಿಸಲು
ಸಾಗುವ ಈ ಕರ್ಮದ ಕಥೆಗೆ
ಕೊನಯೇ ಇಲ್ಲವೆ ಕರುಳೂ ಇಲ್ಲವೆ
ಕುಣಿವ ಕುರುಡು ಕಾಂಚಾಣಕ್ಕೆ?
*****