ಎಂಜಲು ಮೆತ್ತಿ ಮಲಿನಗೊಳುವ ರೊಟ್ಟಿ ಮೈಲಿಗೆ. ಎಂಜಲೊಳಗೆ ಹಾಡಿ ಕುಣಿದು ಕುಪ್ಪಳಿಸುವ ಹಸಿವು ಮಡಿ ಮಡಿ. ವ್ಯಾಖ್ಯೆಯೂ ಪ್ರಭುತ್ವದ ಮೂಗಿನ ನೇರಕ್ಕೇ. *****
ರೂಹುಳ್ಳ ರೊಟ್ಟಿಗೊಂದೇ ಅರ್ಥ ನಿರಾಕಾರ ಅವಿನಾಶಿ ಹಸಿವೆಗೆ ನೂರು ಪರಮಾರ್ಥ ಈ ಅಂತರಗಳ ಅರಿಯುವ ಕ್ಷಣ ರೊಟ್ಟಿಗೆ ಅಲ್ಲೋಲಕಲ್ಲೋಲ. *****
ಅಷ್ಟೆಲ್ಲಾ ತಾರೆಗಳ ಬಿಗಿ ಪಹರೆಯ ನಡುವೆಯೂ ತಿಂಗಳಿಗೊಮ್ಮೆ ಕಣ್ಮರೆಯಾಗುವ ತುಂಟ ಚಂದಿರನಂತೆ, ಮೈ ಎಲ್ಲಾ ಕಣ್ಣಾಗಿ ಕಾದಿರುವ ಹಸಿವಿನ ಪರಿಧಿ ದಾಟಿ ಮರೆಯಾಗಿ ನಿಡುಸುಯ್ಯುತ್ತದೆ ರೊಟ್ಟಿ. *****
ಹಸಿವಿನ ಸಂತೆಯಲಿ ಬಿಕರಿಗೆ ಬಿದ್ದಿದೆ ರೊಟ್ಟಿ ವಿಧವಿಧದ ರೊಟ್ಟಿಗೆ ವಿಭಿನ್ನ ಬೆಲೆ. ಕೊಳ್ಳುವುದು ಅವರವರ ಅರ್ಹತೆ. ರೊಟ್ಟಿ ಬೆಲೆಯುಳ್ಳ ನಿರ್ಜೀವ ಸಾಮಗ್ರಿ *****
ಹಸಿವಿನಿಂದ ರೊಟ್ಟಿ ಬಯಸುವುದು ಪ್ರತಿಕ್ಷಣದ ಅಂತರಂಗ ಸಾಮೀಪ್ಯ ರೊಟ್ಟಿಯಿಂದ ಹಸಿವು ನಿರೀಕ್ಷಿಸುವುದು ಆ ಕ್ಷಣದ ಸಂತೃಪ್ತಿ. ಆಮೇಲೆ ಯಾರು ಯಾರೋ. *****
ಹಸಿವಿಂಗಿಸುವುದೊಂದೇ ರೊಟ್ಟಿಗೆ ಹೊರಿಸಿದ ಹೊಣೆ. ಅಸ್ಮಿತೆಯ ಅರಿವಿನ ಬೀಜ ಏಕೆ ಬಿತ್ತು ಅದರೆದೆಗೆ? ತನ್ಮಯತೆಯಲಿ ಹಸಿವಿನಲಿ ಕರಗಲಾಗದ ಶಾಪ ತಾನೇ ಹೊತ್ತಿದೆ ಬೆನ್ನಿಗೆ. *****
ರೊಟ್ಟಿಯ ಭಾವಲೋಕದೊಳಗೆ ಹಸಿವೆಗೆ ಪ್ರವೇಶ ಸಿಕ್ಕಿಲ್ಲ ಅಸೂಕ್ಷ್ಮ ಹಸಿವೆಗೆ ಮಣ್ಣನಲುಗಿಸುವ ಮೊಳಕೆಯ ಸೂಕ್ಷ್ಮತೆ ಇನ್ನೂ ಅರ್ಥವಾಗಿಲ್ಲ. *****
ಜಾಣ ಹಸಿವಿಗದರದೇ ಆಳ ಅಗಲ ವಿಸ್ತಾರ ಉರುಟು ಮೇಲ್ಮೈ ರೊಟ್ಟಿ ನೇರ. ಮರುಳತೆಯ ಸಾಕಾರ. *****
ಅಸ್ತಿತ್ವ ಮರೆತು ವ್ಯಕ್ತಿತ್ವ ಕಳೆದು ಇನ್ನೊಂದು ಅಭಿನಯಕ್ಕೆ ಸಿದ್ದವಾಗುತ್ತದೆ ಹಸಿವೆ. ಅದಕ್ಕೆ ಗಳಿಗೆಗೊಂದು ಪಾತ್ರ ರೊಟ್ಟಿ ನೆಪ ಮಾತ್ರ. *****
ಚೆಂಡು ಸದಾ ಹಸಿವಿನಂಗಳದಲ್ಲಿ. ಬೇಕೆನಿಸಿದಾಗ ಅಪ್ಪುವ ಮುದ್ದಿಸುವ ಬೇಡೆನಿಸಿದಾಗ ಒದೆಯುವ ಎಸೆಯುವ ಆಯ್ಕೆ ಹಸಿವೆಗೆ. ಕಾಯುವ ಅನಿವಾರ್ಯತೆಯಷ್ಟೇ ಚೆಂಡಾಗುವ ರೊಟ್ಟಿಗೆ. *****