ಹುಲ್ಲು ಹೇಗೆ ಹಾಲಾಗುತ್ತೆ ಹಸುವಿನ ಹೊಟ್ಟೇಲಿ?
ಹಕ್ಕಿಗೆ ಉಸಿರು ಕಟ್ಟೋಲ್ವಾಂತ ಪುಟ್ಟನೆ ಮೊಟ್ಟೇಲಿ?
ಮೋಡದ ತುಂಬ ನೀರಿದ್ರೂನೂ ಅದ್ಹೇಗೆ ತೇಲತ್ತೆ?
ರಾತ್ರೋ ರಾತ್ರಿ ಸೀ ಹಾಲೇಕೆ ಹುಳಿ ಮೊಸರಾಗುತ್ತೆ?
ದೇವ್ರೇ ಇದೆಲ್ಲ ಮಾಡ್ತಾನಂತೆ
ಕಷ್ಟ ಇಲ್ದೇನೆ!
ಬರಿಗೈಯಲ್ಲಿ ಒಬ್ಬನೆ ಹೇಗೆ
ಎಲ್ಲ ಮಾಡ್ತಾನೆ?
ಮಕ್ಕಳ ಎದುರು ಯಾತಕ್ ಹೀಗೆ
ಬಚ್ಚಿಟ್ಕೋತಾನೆ?
ನಮಗೇನ್ ಯಾರೂ ತೋರ್ಸೋರಿಲ್ವಾ?
ನೋಡೇ ಬಿಡ್ತೇನೆ!
ಕಮಲಾ ಮೇಡಂ ತೋರ್ಸೋದಿಲ್ಲ,
ಅಮ್ಮನೂ ಹಾಗೇನೇ;
ನೀನಿನ್ನೂನು ಚಿಕ್ಕೋನ್ ಅಂತ
ಹೇಳ್ತಾರ್ ಸುಮ್ನೇನೆ.
ದುಡ್ಡನ್ನೆಲ್ಲಾ ಕೂಡಿಸ್ಕೊಂಡು
ಅಂಗಡಿಗ್ಹೋಗ್ತೀನಿ,
ದೊಡ್ಡ ದುರ್ಬೀನ್ ತಂದು ದೇವ್ರನ್
ನೋಡೇ ಬಿಡ್ತೀನಿ!
*****
