ಕೇಳಿದ್ದೆವು ಗಗನಸಖಿಯರೆಂದಷ್ಟೆ
ಯಾವ ಮಾಯಾಲೋಕದವರಿವರು-
ತೆಳ್ಳನೆಯ ದೇಹ ಗುಲಾಬಿ ಬಣ್ಣ
ಮೈಗೊತ್ತಿದ ಸೀರೆ ಎತ್ತಿಕಟ್ಟಿದ ಕೂದಲು
ತಿಳಿನಗೆ ಹೊಳಪು ಕಣ್ಣು
ತುದಿಗಾಲಲಿ ನಡೆವ ನವಿಲೆಯರು
ಬೆಡಗು ಬಿನ್ನಾಣಗಿತ್ತಿಯರು
ಮೆಲ್ಲಗೆ ಕೈ ಮುಗಿದು ಸ್ವಾಗತಿಸಿ
ಕುಕಿಲಾಗಿ ಮಾತನಾಡಿ ಸೀಟಿಗೊರಗಿಸಿ
ಚುಟುಕಾಗಿ ಸಲಹೆಕೊಡುವ ಮಾರ್ಗದರ್ಶಿನಿಯರು
ಕಳ್ಳ ನೆಪಮಾಡಿ ಅದುಬೇಕು ಇದುಬೇಕೆನ್ನುತ
ಸೀಟುಬಟನ್ ಅದಮುವ, ಹತ್ತಿರವಾದಂತೆ
ಸುಮ್ಮಸುಮ್ಮನೆ ಕಾಡುವ ಏಕಾಂಗಿಗಳ ಗೆಳತಿ
ತೊಟ್ಟಿಲುಕಟ್ಟಿ ಅಮ್ಮನ ಕೈ ಹಗುರಾಗಿಸಿ
ಬಂಡಲ್ ಕಥೆಗಳ ಏಣಿಏರಿಸಿ
ಕಾಣದ ಆಕ್ಟೋಪಸ್ ತೋರಿಸಿ ಮಕ್ಕಳಿಗೆ
ಬೆರಗಾಗಿಸುವ ಕಿಂದರಜೋಗಿ ಆಂಟಿ
ಟ್ಯಾಕ್ಸ್ ಪ್ರೀ ವೈನ್ ವಿಸ್ಕಿಗಳ ಸೆಳೆತ
ಸುಳಿದಾಡುವ ಹುಡುಗಿಯ ಥ್ರೀ ಡೈಮೆನ್ಶನ್,
ಮತ್ತೆ ಮತ್ತೆ ಗ್ಲಾಸಿಗೆ ಸುರಿಸಿಕೊಳ್ಳುತ
ಸ್ಪರ್ಷ ನೆಪದ ಕುಡುಕರಿಗೆ ಸಾಕಿ
ಮೂರ್ಖ ಶಿಖಾಮಣಿ ವಿದೇಶದಲ್ಲಿ ಆಪರೇಶನ್
ಪಾಪ! ಅಜ್ಜಿಗೆ ಮಂಡಿನೋವು
ಔಷದೋಪಚಾರ ವಯಸ್ಸಾದವರಿಗೆಲ್ಲ ದಾದಿ
ನೂರೆಂಟು ಮಾತು ತುಟಿಯಲಿ ಅರಳಿಸಿ
ಕಣ್ಣಲೇ ಮಾತನಾಡಿ ಬೇಕುಬೇಡದ್ದಕ್ಕೆಲ್ಲಾ
ಪ್ರೀತಿಯೊತ್ತುವ ಗೆಳತಿ ಪೈಲಟ್ ನಿಗೆ ಸ್ಪೂರ್ತಿ
ಊಟ ತಿಂಡಿತೀರ್ಥ
ಪೇಪರು ರಗ್ಗು ದಿಂಬು ಕೊಟ್ಟು ಎತ್ತಿಟ್ಟು
ಶುಚಿಗೊಳಿಸಿ ಪ್ರಸನ್ನಿಸುವ ಪರಿಚಾರಿಕೆ
ಪಯಣದ ಗೆಳತಿ ಗಗನಸಖಿ
ಮೋಡಿ ಮಾಡುವ ಹಸನ್ಮುಖಿ.
*****
