ತೇಲಿ ತೇಲಿ ಹೋಗುತಿಹ
ಬೆಳ್ಮುಗಿಲುಗಳೇ
ನೀವು ಹೋಗುವಲ್ಲಿಗೆ
ಹೊತ್ತು ನಡೆಯಿರಿ
ನನ್ನ ಒಂದಿಷ್ಟು
ಕನಸುಗಳ ಗಂಟ
ನಿಮ್ಮ ಬೆನ್ನಲ್ಲಾದರೂ
ಸಾಕಾರವಾಗಲಿ
ಭಗ್ನವಾಗುಳಿದ ಕನಸುಗಳ
ಅವಶೇಷ
ಅಲ್ಲೆಲ್ಲೊ ಒಂದಿಷ್ಟು ಕಾವಿದ್ದರೂ
ಇಳಿಸಿಬಿಡಿ, ನನ್ನ ಕನಸುಗಳ
ಮೊಟ್ಟೆಯೊಡೆದು ಹಕ್ಕಿಗಳಾಗಿ
ಹಾರಾಡಲಿ
ಕಾವ ಕೊಟ್ಟು ಕೊಟ್ಟು
ಸಾಕಾದಷ್ಟೆ ಫಲ
ನನ್ನ ಕಾವಿಗೆ ಮೊಟ್ಟೆಯೊಡೆದು
ಹಕ್ಕಿಯಾಗುವ ಕುವತ್ತಿಲ್ಲ
ಅಲ್ಲಿ ಅಲ್ಲೆಲ್ಲೊ ನನ್ನ
ಕಣ್ಣೆವೆಗಳಾಚೆ
ಮೊಟ್ಟೆಯೊಡೆದ ಟಪ್ಪೆಂಬ ಸದ್ದು
ಗರಿ ಕೊಡವಿ ಪಟಪಟನೆ
ಹಾರಿದ್ದು, ಕೇಳಲಿ
ಕ್ಷೀಣವಾಗಿಯಾದರೂ
ಅದಷ್ಟಕ್ಕೆ ಸಾರ್ಥಕ ಈ ಜೀವ
ಎಲ್ಲೊ ಕನಸುಗಳು ಜೀವತಳೆದಭಾವ
ಹಾರಿದ ಕನಸುಗಳೇ
ವಿದಾಯ ನಿಮಗೆ
*****
