ಸಂಜೆ ಹಣ್ಣಾಗಿ ಬಿಸಿಲು ಹೊನ್ನಾಗಿ

ಸಂಜೆ ಹಣ್ಣಾಗಿ ಬಿಸಿಲು ಹೊನ್ನಾಗಿ
ಕರಿಮುಗಿಲು ತುದಿ ಮಿಂಚಿ ಜರಿಸೀರೆಯಾಗಿ
ನೀಲಿ ನೀರಲಿ ತೇಲಿ ಚಂದ್ರಾಮ ಬಂದ
ಬಸವಳಿದ ಲೋಕಕ್ಕೆ ಹೊಸ ಚೆಲುವ ತಂದ

ಕಣ್ಣು ಹಾರಿಸಿ ಸೊಕ್ಕಿ ನಕ್ಕವೋ ಚುಕ್ಕಿ
ನಭದಲ್ಲಿ ತೇಲಿದವು ಹಾಯಾಗಿ ಹಕ್ಕಿ;
ಕಡಲ ಮೈ ಮೇಲೆ ಅಲೆಸಾಲು ಮಾಲೆ
ಕಣ್ಣನ್ನೆ ಸೋಲಿಸಿ ಕಾಮಧನು ಲೀಲೆ

ಮರಮರದಿ ಹಕ್ಕಿ, ಒಳಗೆ ಸುಖ ಉಕ್ಕಿ
ಮಾತಿರದ ಸಂಗೀತ ಗಾಳಿಯಲಿ ಬಿತ್ತಿ
ಎಲ್ಲೆಲ್ಲು ದನಿಯೇ ಜೇನಿನ ಹನಿಯೇ
ಇಂಚರದ ಗಣಿಯಾಯ್ತು ಗಳಿಗೆಯಲಿ ಇಳೆಯೇ

ಯಾವ ಕೈ ಈ ಚೆಲುವ ಬರೆಯಿತೋ ಏನೋ
ಈ ಚೆಲುವಿನಡಿಗಿರುವ ಋತದ ಪರಿಯೇನೋ;
ಎಲೆ ಹೂವು ಮರ ಚಿಗುರು ಮಾತ್ರ ಪ್ರತ್ಯಕ್ಷ
ಇದನೆತ್ತಿ ನಿಲಿಸಿದಾ ಬೇರು ಅದೃಶ್ಶ!
*****