ನೀಲಿಯಾಕಾಶ

ಬಣ್ಣ ಬಣ್ಣ ವರ್ಣ ವಿವರ್ಣಗಳ
ಬಿಳಿ ಕರಿ ಮೋಡಗಳಾಚೆ
ತಿಳಿ ನೀಲಿಯಾಕಾಶವೂಂದಿದೆ

ಮುಖಗಳು ಒಂದೋ ಮೂರೋ ಹತ್ತೋ
ಕೈಗಳು ಎರಡೋ ನಾಲ್ಕೋ ಇನ್ನೆಷ್ಟೋ
ವಾಹನ ಆನೆ ಎತ್ತೋ ಇಲಿಯೋ ಹುಲಿಯೋ
ಹಾರ ಕಿರೀಟ ವಸ್ತ್ರಾಭರಣಗಳು
ಝಗಝಗಿಸುವ ಮೂರ್ತಿ ರೂಪಗಳು
ಭವ್ಯದೇಗುಲಗಳು ದೇವರುಗಳು
ದೀಪಧೂಪ ನೈವೇದ್ಯಾದಿಗಳು
ಪೂಜೆ ಪುನಸ್ಕಾರ ಮೆರವಣಿಗೆಗಳ ಹಿಂದೆ
ನಿರಾಕಾರ ನಿರಂಜನ ನಿರ್ಗುಣ ನಿರಲಂಕಾರ
ದೇವನೊಬ್ಬನೇ

ಕೋಪ ತಾಪ ತಲ್ಲಣಗಳ
ಆಶೆ ಪಾಶ ಮೋಹದಾಹಗಳ
ಕುತಂತ್ರ ಕುಚೋದ್ಯಗಳ
ಕ್ರೂರ ಹಿಂಸೆಗಳ ಕೊಲೆ ನರಳುಗಳ
ಮಾನುಷ ಜೀವ ಭಾವಗಳ ಹಿಂದೆ
ತಿಳಿ ಮನವೊಂದಿದೆ

ಅಸಂಖ್ಯ ಅಲೆಗಳ ನೂರೆ ಬುರುಗು
ಏಳು ಬೀಳು ಅಬ್ಬರ ಉಬ್ಬರಗಳ ಕೆಳಗೆ
ಅನಂತ ಅಪಾರ ಸಾಗರವೊಂದಿದೆ
*****