ವಾಸ್ತವ

ಮರುಳು ಮಾಡುವ ಹೆಜ್ಜೆಗಳು
ಎದೆಯಲ್ಲಿ ಹುದುಗಿಕೊಳ್ಳದೆ ತೇಲುತ್ತವೆ
ಭ್ರಮೆಬೇಡ ಪ್ರಮಾಣಪತ್ರ ಬೇಕೆ
ಗೊತ್ತು ಗುರಿ ಇಲ್ಲದ ಹೊತ್ತಿಗೆ
ಬೆಂಕಿ ಹಚ್ಚುತ ನುಸುಳುವಾಕೆ ನಕ್ಕಳು.

ಕೋಳಿಕೂಗಿನ ಶಬ್ದ ಗಂಟೆ ಎಲ್ಲ ನಿಶ್ಶಬ್ಧ
ಒಳಗೊಳಗೇ ಕೊರೆವ ಚಳಿ ನಂಬಿದ್ದಕ್ಕೆ
ಗಕ್ಕನೆ ಸೂರ್ಯನ ಬೆಳಕು ಚಕ್ಕನೆ
ಮನದೊಳಗೆ ಹೊಳಪು ಬಿಸಿಯುಸಿರು
ಮಂಜಿನೊಳಗೊಂದೊಂದೇ ಮೃದುಹೆಜ್ಜೆ
ಹೂವಿನೊಳಗೊಂದೊಂದು ಪಿಸುಮಾತು
ಮನದಂಗಳ ನೂಕಿ
ಮಂದಾರಕ್ಕೇರಿಸುವಾಕೆ ನಕ್ಕಳು-

ಮರುಮರು ಪ್ರಶ್ನೆಗಳಿಗೆ ಮಿಂಚಿನುತ್ತರವಿಲ್ಲ
ಮೋಡದೊಡಲ ಹೊಯ್ದಾಟ ಗುದ್ದಾಟ
ಅನುಕಂಪವಿಲ್ಲದ ಕದನ
ಅರೆಗಳಿಗೆಗೊಮ್ಮೆಮ್ಮೆ ಬೆಕ್ಕುಹೆಜ್ಜೆ
ತಿಳಿನೀರುಕೊಳಕೆ ಹರಳೆಸೆಯುತ
ಅಲೆ ಅಲೆಯಾಗಿ ಹರಡಿಹಬ್ಬಿ
ಆಳ ಪ್ರಪಾತದಾಳಕ್ಕೆ ಸೆಳೆವಾಕೆ ನಕ್ಕಳು

ಸುತ್ತಿಲ್ಲ ಮುತ್ತಿಲ್ಲ ಆಳ ಎತ್ತರಕಿಲ್ಲ
ಸಾಕ್ಷಿಗೆ ಸೃಷ್ಟಿಕರ್ತನ ದಿಬ್ಬಣ
ಒಳಗೊಳಗೆ ನಲುಗಿಸಿ ನಗುತ
ಬೆಚ್ಚಗಿನೆದೆಗೆ ಕನಸುಕೊಡುವ ಚಿತ್ರ
ಸ್ಪರ್ಷಕ್ಕೆ ಹಾತೊರೆಯುವ ವಾಸ್ತವ.
*****