ಶಿವಯೋಗಿ
ಲಂಗೋಟಿ ಕಟ್ಕೊಂಡು ಕಾಡು ಸೇರುವ ಯೋಗಿ
ನೀನೊಬ್ಬ ಹೆಂಬೇಡಿ ಅಂಜುಬುರುಕ
ಇದ್ದ ಜೀವನದಲ್ಲಿ ಇದ್ದಂತೆ ಎದೆಯೊಡ್ಡು
ಶೂರನೇ ಶಿವಯೋಗಿ ಮುದ್ದುಕಂದ
ಲಾಂಛನ
ಪ್ಯಾಂಟು ತೊಟ್ಟರು ಶರಣ ಬೂಟು ತೊಟ್ಟರು ಶರಣ
ಲಾಂಛನದ ಪ್ರಿಂಟಿನಲಿ ಶರಣನಿಲ್ಲ
ಮಾರ್‍ಕೆಟಿನಲಿ ನಿಂತು ಶರಣನಾಗಲು ಬಲ್ಲೆ
ಶರಣತ್ವ ಸಹಜತ್ವ ಮುದ್ದುಕಂದ
ಶರಣ
ಮ್ಯಾಲ ಶಿವಶಿವ ಮಂತ್ರ ಒಳಗ ಕತ್ತರಿ ತಂತ್ರ
ಒಳಗೊಂದು ಹೊರಗೊಂದು ಶರಣಗಿಲ್ಲ
ಬಿಚ್ಚುಗತ್ತಿಯ ವೀರ ಬಯಲ ಯುದ್ಧದ ಶೂರ
ಶರಣ ಸತ್ಯದ ಧೀರ ಮುದ್ದುಕಂದ
ಸಂಯಮ
ಭುವನ ಸುಂದರ ತೋಟ ಶಿವತಾನೆ ಕೈಲಾಸ
ಗೂಳಿಗಳು ಹೊಕ್ಕಾವು ನೋಡು ನೋಡು
ಅತ್ತ ಕಳ್ಳರ ಕಾಟ ಇತ್ತ ಬೆಲ್ಲದ ಬೇಟ
ಸಂಯಮವೆ ಶಿವತತ್ತ್ವ ಮುದ್ದುಕಂದ
*****
