ಓ ನೋಡು ಬೆಳಗಾಯ್ತು ಮೂಡಲವು ಕೆಂಪಾಯ್ತು
ಕೂಡಲದ ಸಂಗಯ್ಯ ಬಂದ ಬಂದ
ಕಾಳರಾತ್ರಿಯ ಹಕ್ಕಿ ದೂರ ಹಾರುತ ಹೋತು
ಶಿವತಂದೆ ಶುಭ ಬೆಳಗು ತಂದ ತಂದ
ಶಿವಯೋಗದಾನಂದ ಶೃಂಗಾರ ಸುಂದರಿಯು
ಶರಣಸುಂದರ ಪಾದ ತೊಳೆದಿರುವಳು
ಮುಳ್ಳು ಮಲ್ಲಿಗೆ ಮಾಡಿ ಕಲ್ಲು ಸಂಪಿಗೆ ಮಾಡಿ
ಸುಣ್ಣ ಬೆಣ್ಣೆಯ ಮಾಡಿ ಕುಣಿದಿರುವಳು
ಭಸ್ಮವಾಯಿತು ಭೂತ ಸುಟ್ಟು ಹೋಯಿತು ಪ್ರೇತ
ಮಾಯೆಯೆಂಬಾ ಶಬ್ದ ಮಾಯವಾಯ್ತು
ರಾವಣೇಶ್ವರ ಹೋದ ದೇವರಾಮನು ಬಂದ
ಮರಣ ಲೋಕಕೆ ಶರಣ ಗಾನಬಂತು
ನೆಲತುಂಬ ಮಳೆಯಾಯ್ತು ಕಣ್ತುಂಬ ಬೆಳೆಯಾಯ್ತು
ಶಿವಶಿವಾ ಶಿವಶಬ್ದ ಹೊಳೆಯಾಯಿತು
ಮುಗಿಲು ಗಂಟಾನಾದ ಕಡಲು ಜಾಗಟೆಗಾನ
ಸೂರ್ಯ ಶರಣನ ಪಾದ ದಯಮಾಡಿತು
*****
