ಕಂಡೇನ ಹೊಸತು ಕಂಡೇನೆ ನಾ
ಆಂಜೇನೆ ಬೆವತು ಓಡೇನೆ ||ಪಲ್ಲ||
ಟ್ಯೂಬ್ಲೈಟು ಒಡದೈತೆ ಪುಡಿಪುಡಿ ಆಗೈತೆ
ದೀಪಾವು ಆರಿಲ್ಲ ಬೆಳಗೇತೆ
ಬಲ್ಬೊಂದು ಬಿದೈತೆ ಫಡ್ಡೆಂದು ಹಾರೈತೆ
ಬಲ್ಬೀನ ದೀಪಾವು ಉಳದೇತೆ ||೧||
ಚಿಮಣೀಯ ಹಚ್ಚೇನೆ ಬಿರುಗಾಳಿ ಬೀಸೇತೆ
ಚಿಮಣೀಯು ಆರಿಲ್ಲ ಬೆಳಗೇತೆ
ಮೊಂಬತ್ತಿ ಹಚ್ಚೇನೆ ಫ್ಯಾನೀಗಿ ಹಿಡಿದೇನೆ
ಮೊಂಬತ್ತಿ ದೀಪಾವು ಉಳದೇತೆ ||೨||
ವಲಿಯಾಗ ಹಿಡಿಕೆಂಡ ಕೊಡನೀರು ಸುರುವೇನೆ
ನಿಗಿನಿಗಿ ನಿಗಿಕೆಂಡ ಉರದೇತೆ
ಹೊಸಹಣ್ಣು ಕಂಡೇನೆ ಗಸಗಸ ಹೆಚ್ಚೇನೆ
ಹೊಸಹಣ್ಣು ಇದ್ದಾಂಗ ಉಳದೀತೆ ||೩||
ಕೆಂಡಾವು ಯಾರವ್ವ ಕೊಡಪಾನ ಯಾರವ್ವ
ಒಡಪಾವ ಬಿಡಿಸವ್ವ ಜಾಣಮಲ್ಲಿ
ದೀಪಾವು ಯಾರವ್ವ ಬಿರುಗಾಳಿ ಯಾರವ್ವ
ಒಡಪಾವ ಒಡೆಯವ್ವ ಜಾಣಕಲ್ಲಿ ||೪||
*****
ಟ್ಯೂಬ್ಲೈಟು, ಬಲ್ಬು, ಚಿಮಣಿ, ಮೋಂಬತ್ತಿ, ವಲಿಗಳು ದೇಹದ ಸಂಕೇತ; ಅವುಗಳ ಜ್ಯೋತಿ ಆತ್ಮಜ್ಯೋತಿ
