ಬಂಗರ ಚಂದ್ರಾ ಮುಗಿಲಾ ಇಂದ್ರಾ
ಹೌವ್ವನೆ ನಕ್ಕಿದ್ದಾ|| ಏನ್ಚಂದಽಽ ಏನ್ಚಂದಽಽ ||ಪಲ್ಲ||
ಚಂಚಂದಾಗಿ ಆಡ್ಯಾಡ್ಯಾಡ್ತಾ-
ನನ್ನನ್ರಾಗ ಇಲ್ಲಾಗಿ ಹೋದ
ಬಂದೇನೆಂದು ಬ್ಯಾಸತ್ತಾನು
ಹೇಳೇಳ್ರಾಗ ಗಳ್ಳನೆ ಹೋದ ||೧||
ಕಂಡ್‍ಕಂಡಾನು ಕಲ್ಲಾಬಿಲ್ಲಿ
ಹೌವ್ವವ್ವಾರಿ ಸೆರಗಿಡಿರಾಗ
ಕಣ್ಣಾರೆಪ್ಪಿ ಗಪ್‍ಗಪ್ಪಾಗಿ
ಬಿಚ್ಚಿದ ಎದಿಯಾ ಕಟ್‍ಕಟ್‍ರಾಗ ||೨||
ಮಿಂಡಾ ಬಂದು ಪುಂಡಿ ಕಟ್ಟಿ
ಪೆಂಡಿ ಹೊತ್ತಾ ಎನ್ನನ್ರಾಗ
ಗೂಳಿ ಮ್ಯಾಗ ಗೂಳಿ ಬಂದು
ಗೋಳು ಆತು ಅನ್ನನ್ರಾಗ ||೩||
ಸುತ್ತಾಡ್ಕೊಂತ ಸರಗಾಡ್ಕೊಂತ
ಹರಗ್ಯಾಡ್ಕೊಂತ ಹಿಡಿಹಿಡಿರಾಗ
ಸುದ್ದಿಲ್ದಂಗ ಸದ್ದಿಲ್ದಂಗ
ಇದ್ದಲ್ಲಿದ್ದು ಇಲ್ದಂಗಾದಾ ||೪||
ಗುಂಗುರುಗೂದ್ಲಾ ಸಿಂಗರಗಲ್ಲಾ
ಅಲ್ಲಾ ಬೆಲ್ಲಾ ಮೆಲ್‍ಮೆಲ್‍ರಾಗ
ಬಂದಾ ಬಂದಾ ಎನ್‌ಎನ್ ರಾಗ
ಬಂದಂಗಾಗಿ ಬಾಲ್ದಂಗಾದಾ ||೫||
*****
