ಒಂದೇ ಒಂದು ಬಿಳಿಯ ಕೂದಲು
ಬಂದಿತೆಂದು ಏಕಿಷ್ಟು
ಬೇಜಾರ ಮಾಡಿಕೂಳ್ಳುವೆ?|
ನನಗೆ ನೀ ಇನ್ನೂ ಹದಿನಾರರ ಚೆಲುವೆ
ಪ್ರೇಮದಲಿ ಕಾಣಿಸುವುದೇ ವಯಸ್ಸು?||
ನಿನ್ನ ಒಲವು ನಿನ್ನ ಚೆಲುವಿಗಿಂತ
ದಿನೇದಿನೇ ಎತ್ತರೆತ್ತರಕ್ಕೆ ಬೆಳೆಯುತಿದೆ|
ನಿನ್ನ ಸೌಂದರ್ಯ ತರುಲತೆಯಂತೆ ಚಿಗುರಿ
ನನ್ನ ಮನಕೆ ಮುದವ ನೀಡುತಿದೆ
ಬಿಡು ಚಿಂತೆಮಾಡುವುದ ನೀನು||
ಮುಪ್ಪು ದೇಹಕೆನೇ ಹೊರತು
ಮನಸಿಗಂತು ಅಲ್ಲವೇ ಅಲ್ಲ|
ಒಲಿದ ಹೃದಯಗಳಿಗೆ
ಪ್ರೀತಿ ಪ್ರೇಮ ಸದಾ ಹೊಸದು|
ಬಣ್ಣ ಬಣ್ಣದೋಕಳಿಯ ಹಾಗೆ
ನವನವೀನ ವರ್ಣಮಯ|
ಹೂ ದುಂಬಿಯೆರಡು ಹೂಬನದಿ
ಮಧು ಜೇನ ಹೀರಿದಂತೆ
ಜೀವನ ಸವಿಯ ಸವಿಯೋಣ||
ಬಂದರೆ ಬರಲಿಬಿಡು
ಒಂದೆರಡು ಬೆಳ್ಳಿ ಬಿಳಿ ಕೂದಲು|
ಹಾಗೆ ಒಂದೆರಡು ಕೆನ್ನೆ ಮೇಲೆ ಸುಕ್ಕು
ಕಣ್ಣ ಕಾಡಿಗೆ ಸುತ್ತ ಒಂದಿಷ್ಟು ಕಪ್ಪು|
ಮಗನಿಗೆ ಬರುತಲಿದೆ ಕುಡಿಮೀಸೆ
ನನಗೂ ಬಿಳಿಯಾಗುತಿದೆ ಹಳೇ ಮೀಸೆ
ಜೊತೆ ಜೊತೆಗೆ ಬೊಳಾಗುತಿದೆ ತಲೆ||
*****
