ಮೂಲ ತಿಳಿಯದ ಆಳ ಅರಿಯದ
ಮುಗ್ದ ಮನಸ್ಸುಗಳು ಕಲ್ಪನೆ
ಚಿಟ್ಟೆಗಳರಸಿ ವಿಸ್ಮಯಕೆ ಒಡ್ಡಿ
ಎಲ್ಲಿಂದಲೋ ಬಂದವರು ಒಂದಾದ
ಅಂಗಳ ಓಣಿ, ಶಾಲೆ, ಬಯಲು.
ಜತನದಲಿ ಒಂದಾದ ಗೆಳೆತನ
ಕಾಪಿಟ್ಟ ಭಾವಗಳ ಒಂದೊಂದಾಗಿ
ಅರಸಿ ಆರಿಸಿತಂದ ಕಡ್ಡಿ, ದಾರ ಬಣ್ಣ
ಬಣ್ಣದ ಕಾಗದಗಳು ಗೋಂದು
ಎಳೆಕರಗಳು ಉತ್ಸಾಹದ ಸ್ಪರ್ಶ ಬಯಲು.
ಉದ್ದ ಅಗಲಕೆ ಬಾಗು ಬಿಲ್ಲಿನ ಕಣೋಟ
ಮೂಡಿದವು ಪುಟ್ಟ ಪಾದದ ಗುರುತುಗಳು
ಒಡಲ ಸ್ನೇಹಿ ಹಾಸಿದ ನೀಲಿ ಭಾನು
ಭೂಮಿಯಲಿ ಅರಳಿದ ಅಂತರಂಗ ಸಿಂಚನ
ಮೃದು ಅಂಗೈಗಳು ಮುಖಮಾಡಿದ ಆಕಾಶ.
ಬಯಲು ಕಣಕಣ ಅನುರಣ ಮೃದು
ಗಾಳಿ ಬೀಸಿ ತೇಲಿ ಹಂಸಧ್ವನಿ ಅಚ್ಚರಿ
ಕಣ್ಣ ತುಂಬಿದ ಹಾರಾಟ ಭವ ಅನುಭವ
ಹಾರಿ ಹಾರಿ ಚಿಗುರು ಚಿಮ್ಮುವ
ಮೊಳಕೆ ಸಂಭ್ರಮ ಎದೆ ತಟ್ಟಿದ ಗಾಳಿಪಟ.
*****