ಬಾಳುವೆನು ಭಗವಂತನಾನಂದ ತೊಟ್ಟಿಲಲಿ
ಈ ಹಗಲು ರಾತ್ರಿಗಳ ತೂಗಿ ತೂಗಿ
ಆತ್ಮ ಜೋಜೋ ಮಗುವೆ ಬಿಂದು ಜೋಜೋ ಶಿಶುವೆ
ಜೋಕಂದ ಜೋಗುಳದ ನಾದವಾಗಿ
ಬೆಚ್ಚನೆಯ ತೊಟ್ಟಿಲಲಿ ಕೆನೆಬೆಲ್ಲ ಚುಂಬನದಿ
ಸಕ್ಕರೆಯ ಎದೆಹಾಲ ಪಾನಗೈವೆ
ವಿಶ್ವದೇವತೆ ತಾಯಿ ಹೆತ್ತಾಯಿ ನಲ್ದಾಯಿ
ಕೆನೆಹಾಲ ಗಲ್ಲದಲಿ ಆಟಗೈವೆ
ಕಣ್ಣೊಳಗ ಕಿವಿಯೊಳಗ ತಾಯಿ ತುಂಬಿದಳವ್ವಾ
ಎದಿಯೊಳಗ ಮನದೊಳಗ ಮುದ್ದು ತಾಯಿ
ಎಂಥ ಶಾಂತಿಯ ತಾಯಿ ಎಂಥ ಪ್ರೀತಿಯ ಆಯಿ
ಆನಂದ ಸಾಗರದ ದೇವಿ ತಾಯಿ
ಓ ಅವ್ವ ನನ್ನವ್ವ ಬೆಣ್ಣೆ ಸಕ್ಕರೆಯವ್ವಾ
ಅಂಜಿದೆನು ಈ ಬಾಳ ದೆವ್ವಗಳಿಗೆ
ಓ ಅವ್ವ ಬಾರವ್ವ ನೆತ್ತೀಯ ತಿಕ್ಕವ್ವಾ
ಹಸಿಯಾದೆ ಈ ಬೆಮರ ಬಟ್ಟೆಯೊಳಗೆ
ಕಣ್ಣು ಮುಚ್ಚಲು ತಾಯಿ ಕಣ್ಣು ಬಿಚ್ಚಲು ತಾಯಿ
ಅತ್ತಾಗ ನಕ್ಕಾಗ ತಾಯಿ ತಾಯಿ
ತೊಟ್ಟಿಲಲಿ ಇದ್ದಾಗ ನೆಲದಲ್ಲಿ ಬಿದ್ದಾಗ
ಎದ್ದಾಗ ನಿದ್ಯಾಗ ತಾಯಿ ತಾಯಿ
*****
