ನೀವು ನಗೆ ದೀವಟಿಗೆಗಳನ್ನು
ಖರೀದಿಸುತ್ತೀರಾ?
ನೀವು ಚಿಗಿತ ಆಸೆಗಳನ್ನು
ಖರೀದಿಸುತ್ತೀರಾ?
ನೀವು ಕುಪ್ಪಳಿಸುವ ಕನಸುಗಳನ್ನು
ಖರೀದಿಸುತ್ತೀರಾ?
ಹಾಗದರೆ ನಮ್ಮಲ್ಲಿಗೆ ಬನ್ನಿ.
ನಮ್ಮಲ್ಲಿ ಲಾಟರಿ ಟಿಕೇಟು
ಮಾರುವ ಪುಟ್ಟ ಹುಡುಗರಿದ್ದಾರೆ.
ಕಣ್ಣಲ್ಲೆ ಕಟ್ಟಿ ಹಾಕುತ್ತಾರೆ.
ಪ್ರೀತಿಯಿಂದ ಅಂಟಿಕೊಳ್ಳುತ್ತಾರೆ.
ಆಸೆ-ಕನಸುಗಳನ್ನು ಹರವಿ
ಬೆಲೆ ಮಂಡಿಸುತ್ತಾರೆ.
ಒಂದು ರೂಪಾಯಿ ತೆತ್ತು ಖರೀದಿಸಿದರೆ
ಕೈ ಮುಗಿದು ಕೃತಜ್ಞತೆ ಸಲ್ಲಿಸುತ್ತಾರೆ.
ಶುಭ ಹಾರೈಸುತ್ತಾ ಬೀಳ್ಕೊಡುತ್ತಾರೆ.
ಅಂತೆಯೆ…
ಒಮ್ಮೆ ನಮ್ಮಲ್ಲಿಗೆ ಬನ್ನಿ.
ನಮ್ಮ ಹುಡುಗರ ತುಟಿಯಂಚಿನ
ನಗೆಯನ್ನು ಖರೀದಿಸಿ.
ನಮ್ಮ ಹುಡುಗರ ಕಣ್ಣಂಚಿನ
ಕನಸುಗಳನ್ನು ಖರೀದಿಸಿ.
ನಮ್ಮ ಹುಡುಗರ ಮೋರೆಯಲ್ಲಿ
ಚಿಗಿತ ಆಸೆಗಳನ್ನು ಖರೀದಿಸಿ.
ನಮ್ಮ ಹುಡುಗರ ನಾಳೆಗಳನ್ನು
ನಿಮ್ಮ ಜೇಬುಗಳಲ್ಲಿ
ಭದ್ರಪಡಿಸಿ ಸಂರಕ್ಷಿಸಿ.
