ದುಷ್ಟರನು ಬಹುದೂರವಿರಿಸಯ್ಯ ಹರಿಯೆ
ಇಷ್ಟಾರ್ಥಗಳನೆನಗೆ ಕೊಡದಿರಲು ಸರಿಯೆ

ಎನ್ನ ಒಳಗಡಗಿರುವ ಕಳ್ಳರಿಗೆ ಸೋತಿಹೆನು
ನಿನ್ನ ಧ್ಯಾನವನೆನಗೆ ದಕ್ಕಗೊಡರಿವರು
ಕಣ್ಣು ಬಡಿಯುವ ಕ್ಷಣಕೆ ನಿನ್ನ ಮರೆಸುತಲಿಹರು
ಇನ್ನಾವ ಬಗೆಯೊಳಗೆ ಧನ್ಯಳಾಗುವೆನೊ

ವಿಷಮಯದ ಮೋಹವನು ಸವಿಮಾಡಿ ಉಣಿಸುವರು
ಹಸಿವ ತೀರಿಸುವಂತೆ ನಟನೆ ಮಾಡುವರು
ವಿಷಮಸ್ಥಿತಿಗೆನ್ನೆಳೆದು ಕ್ರೋಧವನು ತುಂಬುವರು
ಮಸೆಯುತಿಹರೆನ್ನೊಳಗೆ ಮಾತ್ಸರ್‍ಯ ಮದವ

ಕಂಡುಕಂಡುದನೆಲ್ಲ ಕೊಂಡು ತಾ ಎಂಬುವರು
ಉಂಡು ತಣಿಯರು ಒಮ್ಮೆ ದುರುಳ ಚಂಚಲರು
ಖಂಡಿಸಲು ಛೀ ಎಂದು ದಳ್ಳುರಿಯನುಗಿಯುವರು
ದಂಡನೆಗೆ ಮೀರಿಹರು ಎನ್ನ ಕಾಡುವರು

ಕಡಿವಾಣವಿಲ್ಲದೆಯೆ ನಡಸುವರು ಅಂಧಳನು
ಎಡವಿದರು ಸರಿ ಎಂದು ಬೆನ್ನ ಚಪ್ಪರಿಸಿ
ತುಡುಗರನು ಸದೆಬಡಿದು ಎತ್ತಿಕೋ ನಿನ್ನೆಡೆಗೆ
ಒಡೆಯ ಸಾರಥಿಯಾಗೊ ನಿನ್ನ ಜನಕಜೆಗೆ
*****

ಜನಕಜೆ
Latest posts by ಜನಕಜೆ (see all)