ಎರಡು ದೃಶ್ಯಗಳು

ಉರಿಬಿಸಿಲಲ್ಲಿ ಗಾಣದ ಸುತ್ತ
ಜೀಕುತ್ತಿದೆ ಮುದಿ ಎತ್ತು;
ಬತ್ತಿದ ಕಣ್ಣು ಕತ್ತಿನ ಹುಣ್ಣು
ನೊಣ ಮುಸುರುತ್ತಿವೆ ಸುತ್ತೂ:
ಬಳಲಿದೆ ಕಾಲು ಎಳೆದಿವೆ ಭಾರ
ಬೆನ್ನಿಗೆ ಬೆತ್ತದ ಪಾಠ,
ಎದುರಿಗೆ ಮಠದಲಿ ಬಸವ ರಥೋತ್ಸವ
ಸಿಹಿಸಿಹಿ ಭಕ್ಷ್ಯದ ಊಟ!

* * *

ಬಸ್ಸು, ಲಾರಿ, ಸ್ಕೂಟರ್, ಕಾರು
ಬರುತಿವೆ ಬಲು ಜೋರಿಂದ;
ಸ್ಕೂಟರ್ ಮೇಲೆ ಮದಿಸಿದ ಯುವಕ
ಹಿಂದಿದೆ ಐದರ ಕಂದ.
ಎರಡು ಕೈಯಲೂ ಸ್ಕೂಟರ್ ಹಿಡಿದೇ
ನಿದ್ದೆ ಮಾಡುತಿದೆ ದೇವರೇ!
ಕೂಗುವಂತಿಲ್ಲ, ಬಿಡುವಂತಿಲ್ಲ
ಓಡಿದೆ ಸ್ಕೂಟರ್ ಹಾಗೇ.
*****