ಕವಿ

ಮುಚ್ಚು- ಮರೆ ಇಲ್ಲದ ಚೊಕ್ಕ ಸ್ಫಟಿಕದ ಹೃದಯ
ಕಾವ್ಯ ವಾಹಿನಿಯ ಉದಯ ಬಿಂದು
ಕವಿಯ ಹೃದಯ; ಕಾವ್ಯ ಜ್ಯೋತಿಯ ಕಾಯ
ಮಿಂಚಿಹುದು; ಓ ಚಿಮ್ಮಿ ಬಂದಿಹುದು

ಸರ್ಗಗ೦ಗೆಯ ಕರೆದು ನಲಿದಾಡಬಲ್ಲ
ಸೂರ್ಯ ಚಂದಿರರೊಡನೆ ಆಡಬಲ್ಲ
ಶಾಂತಿ ರೌದ್ರದ ಕಂಠ ಒಂದು ಮಾಡಲುಬಲ್ಲ
ವಿಶ್ವ ಶಕ್ತಿಯ ಬಿಂಬ ಕವಿಯೆ ಎಲ್ಲ

ಪಾತಾಳ ಮೇಲೆತ್ತಿ, ಸ್ವರ್ಗ ಆಳಕೆ ಒತ್ತಿ
ಕುಣಿದು ನಲಿಯಲು ಬಲ್ಲ ಕವಿಯು
ಲೋಕಗಳನು ಕಾಣುವನು ತನ್ನೊಳಗೆ ಕೆತ್ತಿ
ಚಿತ್ರಿಸುವನು ವಿಶ್ವವನೆ ಕವಿಯು

ಸೃಷ್ಟಿ ಮಾಡುವ ಶಿಲ್ಪಿ, ಪ್ರಳಯದದ್ಭುತ ಶಕ್ತಿ
ಬಾಳ ಬೆಳಗಿನ ಜ್ಯೋತಿ ಇವನು
ಸತ್ಯ ಸೌಂದರ್ಯದೊಳು ಸತ್ಯಶಿವನ ನುಡಿವ ವಿರಕ್ತಿ
ಸರ್ವಸ್ವ ಭಾಗ್ಯ ವೀರನೇ ಇವನು
*****