ನಾನಿಲ್ಲಿ ಸುಮ್ಮನೆ ಬೀಳುವ
ಮಳೆಯ ಹನಿಗಳಿಗೆ ಪರಿತಪಿಸುತಿರುವೆ
ಮಾತಿಲ್ಲದೆ ಮಿಂಚು ಸುಳಿಗೆ
ಹರಿದಾಡುವ ಪರಿಗೆ ಭಯಪಡುತಿರುವೆ
ಆರ್ಭಟದ ಗುಡುಗಿನ ಸಪ್ಪಳಗೆ
ಬಡಿದುಕೊಳ್ಳುವ ಎದೆ ಕುಸಿಯುತಿದೆ
ನಿನ್ನ ನೆನಪಿನಲಿ.
ಎಲ್ಲ ದಿಕ್ಕುಗಳಿಂದ ಗಾಳಿ ಹೊತ್ತು
ತಂದ ಗಂಧದ ಪರಿಮಳಕೆ ತಳಮಳ
ಮರದಿಂದ ತೊಟ್ಟಿಕ್ಕಿದ ಹನಿಗಳು
ಎಲ್ಲೋ ಕಾಡಿ ವಿಭ್ರಮಿಸುವ ಕನಸುಗಳು
ಕುಡಿಯೊಡೆದ ಚಿಗುರು ಹಸಿರು ಮೂಡಿದ
ಮೂಕ ಮರ್ಮರ ಉಸಿರು
ಬಸಿರಾಗುತಿದೆ ನಿನ್ನ ನೆನಪಿನಲಿ.
ಮುರಳಿ ಊದಿದ ಕೊಳಲುಗಾನ
ಸೊಂಪಾಗಿ ಕರೆಯುತಿರೆ ಕೊರಳು
ಪ್ರೀತಿಯಲಿ ಹನಿಹನಿಯಾಗಿ ಹರಿದ
ಯಮುನೆಯ ತಟದಲಿ ನಿನ್ನ ಭಾವ
ಗೀತೆಗಳು ಉಲಿಯುತಿದೆ ಅಂತರಂಗದಲಿ
ಕರೆಯ ಬಾರದೇ ನೀನು, ಹಗುರಾಗಬೇಕಾಗಿದೆ
ನಾನು ನಿನ್ನ ನೆನಪಿನಲಿ.
*****
