ಎಂಥ ಭಾರತ ೧

ಚರಿತ್ರೆ, ಪೂರ್ವ-ಚರಿತ್ರಯ ಅಚಾರಿತ್ರಿಕ ಕಂತೆಗಳನಿನ್ನು ಕಟ್ಟಿಡಿ
ಕಾಣದುದರ ಕೈಕಾಲುಗಳಿಗೆ ಜೋತಾಡಿ ಕಾಗದ ಕರ್ರಗೆ ಮಾಡಿದ್ದ
ತೆಗೆದಿಡಿ
ಹಿಂದಿನದನ್ನೇ ಬೊಗಳಿಕೂಳ್ಳುವ ಬೋಳೆಯರ ಪರಿಯನ್ನಿನ್ನು ಬಿಡಿ
ಆಕಾಶ ಮಲ್ಲಿಗೆ ಸಂಪಿಗೆಗಳ ಮೂಸಿದಿನ್ನು ಸಾಕು

ಇಗೋ ನೋಡಿ ನಿಮ್ಮ ಮುಂದಿರುವುದು
ಪವಿತ್ರ-ಪುಣ್ಯಭೂಮಿ ಭಾರತವಲ್ಲ,
ಹಂದೆಗಳ ಹಡೆಯುವ, ದಾರಿದ್ರ್ಯ ದಳ್ಳುರಿಯ,
ಆತ್ಮಘಾತಕತನದ ಗಟಾರ ಮತಿಗಳ ಶುಷ್ಕನೆಲ

ನಾವೀಗ ಕೂಪ ಮಂಡೂಕಗಳು, ನಿಜವನರಿಯದ ನಿಯಮರಹಿತರು
ಹಲವು ಹಲ್ಕಟ್ತನಗಳ ಮುಚ್ಚಿ ಆದರ್ಶ ಹಾಡುವ ಮರುಳರು
ಸೋದರ ಸೋದರಿಯರೆಂದು ಹಾದರ ಮಾಡುವ ಲಂಪಟರು
ಪತಿವ್ರತೆಯರ ಮೇಕಪ್ಪಿನೊಳಗೆ ಮಿಡುಕುವ ಪತಿ-ತರು
ಸಂಪನ್ನ ರಾಮರೊಳಗೆ ಹುದುಗಿರುವ ರಾವಣರು

ಜಗವನ್ನೇ ಬೆಳಗಿದ ವಿಜ್ಞಾನ ರವಿಕಿರಣಗಳು
ಈ ಕಾಡಿನೆಲೆಗಳನೂ ಮುಟ್ಟಿಲ್ಲ, ನೆಲಕಿಳಿಯುವುದು ಕೇಳಬೇಡಿ,
ಇಲ್ಲಿಯ ಕಾಗೆ ಗೂಗೆಗಳಿಗೆ ಹೊಸ ಸತ್ಯ ಬೋಧಿಸಿದರೆ
ಅವು ಕೂಗುವುದು ಮತ್ತದೇ ಕಾಕಾ ಗೂಗೂ,
ಇಲ್ಲಿಯ ನಾಯಿಗಳಿಗೆ ಹೊಸ ಶಾಸ್ತ್ರ ಕಲಿಸಿದರೆ
ಅವು ಒದರುವುದು ಮತ್ತದೇ ಬೌಬೌ
ಇಂಗ್ಲೀಷ್ ಮಾದರಿಯ ನಗೆ-ನಡೆ-ಉಡಿಗೆಗಳೊಳಗೆ
ಯಾವ ಬೆಳಕಿಗೂ ಮೈತೋರಿಸದ ಬಾವಿ ಇದು
ಯಾವ ಹೊಸ ಗಾಳಿಗೂ ಬಗ್ಗದ ಮೋಟು ಮರವಿದು
ಯಾವ ಹೊಸ ಬೀಜವೂ ನಾಟದ ಕಗ್ಗಲ್ಲಿದು
*****