ಅಕ್ಷರ ಜ್ಯೋತಿಯ ಬೆಳಗೋಣ ನಾವ್
ಅಕ್ಷರ ಸುಖವನು ಪಡೆಯೋಣ ||ಪ||
ಬಾಳಿನ ನೆಮ್ಮದಿ ಸುಖ ಸೌಭಾಗ್ಯದ
ಮನ್ವಂತರಕಿದು ಮೊದಲ ಪಣ
ನೂತನ ಸಮಾಜ ಕಟ್ಟೋಣ ನಾವ್
ಭವ್ಯ ಭಾರತವ ಬೆಳೆಸೋಣ ||೧||
ಅಜ್ಞಾನವೆಂಬ ಕತ್ತಲೆ ಮನೆಯಲಿ
ಕೊಳೆಯುತ ಬಾಳೋದು ಸಾಕಣ್ಣ
ಜ್ಞಾನದ ದೀಪವ ಹಚ್ಚೋಣ ನಾವ್
ಬೆಳಕಿನ ಮಕ್ಕಳು ಆಗೋಣ ||೨||
ಮೂಢ ನಂಬಿಕೆಯ ಜಡಪತಂಗಗಳು
ದೀಪದ ಉರಿಯಲಿ ಸುಡುತಾವೆ
ಹಣೆಬರವಾದದ ಕಣ್ಕಪ್ಪಡಿಗಳು
ತಂತಾವೆಲ್ಲೋ ಓಡ್ತಾವೆ ||೩||
ಅನಾರೋಗ್ಯದಾ ಹಳಸಲು ನಾತವು
ಇಲ್ಲದೆ ಮನೆ ತಿಳಿಯಾಗುವುದು
ಕೊರಡುಗಟ್ಟಿರುವ ದಾರಿದ್ರ್ಯದ ಅಂ
ಗಾಂಗಗಳಿಗೆ ಬಲವಾಗುವುದು ||೪||
ಅಕ್ಷರ ದೀಪವ ಹಚ್ಚೋಣ ಅದು
ಶಕ್ತಿಯು ಮುಕ್ತಿಯು ಎನ್ನೋಣ
ಮನೆ ಮನೆ ಊರೂರ್ ಕೇರಿಕೇರಿಗಳ
ಬೆಳಕಿನ ಲೋಕವ ಮಾಡೋಣ ||೫||
*****
