ಆಕಾಶ ಸಾಕ್ಷಿಯಾಗಿ
ಸೂರ್ಯನೊಂದಿಗೆ ಕೂಡಿದ
ಹೊಟ್ಟೆ ಉಬ್ಬುಬ್ಬಿನ ಮರುಭೂಮಿಯ
ಬಸಿರು, ಸುಖವಾಗಿ ಪ್ರಸವಿಸಲೇ ಇಲ್ಲ
ಬಯಕೆಯಲಿ ಬೆಂದು
ಓಯಸಿಸ್ ನೀರು ಕುಡಿದು
ತನ್ನ ಸಿಟ್ಟಿಗೆ ತಾನೇ ಕ್ಯಾಕ್ಟಸ್ ಗಂಟಿಯಾಗಿ
ಮೈ ಪರಿಚಿಕೊಂಡು, ದಳ್ಳುರಿಗೆ
ಸಿಡಿದೆದ್ದ ಬಸುರಿನ ತುಣುಕುಗಳು
ಇಡಿಯಾಗಿ ಸುರಿಯುವ
ಮರಳ ದಿಬ್ಬಗಳು
ಜಾದೂಗಾರನ ಕಣ್ಕಟ್ಟಿನಂತೆ
ಬಿಸಿಲಿಗೆ ಬೆತ್ತಲೆಯಾಗಿ
ಬಿದ್ದ ಮರುಭೂಮಿ
ಸಾವಿರಾರು ವರ್ಷಗಳಿಂದ
ಹಾತೊರೆಯುತ್ತಿದೆ ಮೋಕ್ಷಕ್ಕೆ
ವಿದೇಶಿಗರ ಶಸ್ತ್ರಗಳ ಛೇದನದೊಳಗೆ
ಬಸಿರಿನಿಂದ ಪುಟಿದೆದ್ದ ಕೂಸು ಈ ‘ಪೆಟ್ರೋಲ್’
ಮರುಭೂಮಿಯ ಹಡಗು ‘ಒಂಟೆಗೆ’
ಈಗ ಮಾಲಿಕನ ಪ್ರೀತಿ ಇಲ್ಲ
ಅವನ ಕಾರುಗಳಡಿ ಸಿಕ್ಕು ಒದ್ದಾಡುತ್ತಿದೆ
‘ಓಯೊಸಿಸ್’ ಸುತ್ತಲಿನ ಪ್ರೇಮಿಗಳು
ಮನೆಗೆ ಮರಳು ಬೀಳಲು ಬಿಟ್ಟು
ದಿನ್ನೆಯ ಮೇಲಿಂದ ಹಾರುತ್ತಿದ್ದರೆ
ವಿದೇಶಿಗರು ಜಾರು ಬಂಡೆಯಾಡುತ್ತಿದ್ದಾರೆ.
*****
ಪುಸ್ತಕ: ಗಾಂಜಾ ಡಾಲಿ
