ಇದಾವ ಶಕ್ತಿಯಿಂತು ನನ್ನ
ನಿನ್ನೆಡೆಗೆ ಸೆಳೆವುದು?
ಇದೇಕೆ ನಿನ್ನ ಕಂಡರಿಂತು
ದುಡಿಯೊಲೆದೆಯು ಬಡಿವುದು?
ಮಧುರ ದುಃಖ ಸುಳಿವುದು?
ಪಾಶವೀ ಕಾಮವೆನಲೆ?
ರಸವ ಹೀರಿ ಸಿಪ್ಪೆಯುಗುಳಿ ಬಿಸುಡುವಂತೆ ಕಬ್ಬನು
ಹೆಣ್ಣ ಹೀರ್ವ ಕಾಮಿ ಕೂಡ ನೀ ಕುರೂಪಿ ಎಂಬನು!
ಸ್ಫಟಿಕ ಸ್ವಚ್ಛ ಪ್ರೇಮವೆನಲೆ?
ತುಟಿಗೆ ತುಟಿಯ ಎದೆಗೆ ಎದೆಯ ಬೆಸೆದು ನಿನ್ನ ತನುವೊಳು
ನನ್ನ ಕರಗಿಪುತ್ಕಟೇಚ್ಛೆ ಮೊಳಗುತಿಹುದು ಎದೆಯೊಳು
ಅಂತಾದೊಡೆ,
ಇದಾವ ಶಕ್ತಿಯಿಂತು ನನ್ನ
ನಿನ್ನೆಡೆಗೆ ಸೆಳೆವುದು?
ಇದೇಕೆ ನಿನ್ನ ಕಂಡರಿಂತು
ದುಡಿಯೊಲೆದೆಯು ಬಡಿವುದು?
ಮಧುರ ದುಃಖ ಸುಳಿವುದು?
ನಿನ್ನ ನಡೆಯು ದೀಪದ ಕುಡಿಯಂತೆ ಬಾಗಿ ಬಳುಕದು!
ನಿನ್ನ ಜಡೆಯು ನಾಗರವನು ಎಳ್ಳನಿತೂ ಹೋಲದು!
ಹಾಲುಕೆನೆಯ ನಗುವ ಬಣ್ಣ ನಿನ್ನ ಪಾಲಿಗಿಲ್ಲವು!
ವಿಶಾಲ ನೇತ್ರಗಳನು ಪಡೆವ ಪುಣ್ಯ ನಿನ್ನದಲ್ಲವು!
ಭಾವಿಸೆ ನೀ ಕುಬ್ಜೆ; ಬಗ್ಗ ಬೇಕು ತುಟಿಯ ಸಂಧಿಸೆ
ತಿರೆಯ ಮರೆತು ನಿನ್ನ ತೋಳ ನಡುವೆ ಹಿಡಿದು ಬಂಧಿಸೆ!
“ನಿನ್ನ ಕೆನ್ನೆ ದಪ್ಪವೆಂದು ಜರೆವ ಜನರು ಜರೆಯಲಿ!
ನನಗೆ ಅವೇ ರಸಪೂರಿಯ ಮಾವಿನ ಫಲ ತಿರೆಯಲಿ!
“ದಿಟವು ನಿನಗೆ ದಪ್ಪ ತುಟಿಯು, ನಾನೆ ಅದನು ಕಾಂಬೆನು!
ತುಟಿಯಿಲ್ಲದ ಬಾಯಿಗಿಂತ ಇದೇ ಮೇಲು ಎಂಬೆನು!
“ಕಿರಿದಾದರು ನಿನ್ನ ನೇತ್ರ ಅದರ ಕಾಂತಿಯೆಂಥದು!
ಮೋಟಾದರು ನಿನ್ನ ಜಡೆಯು ಅದರ ಲಾಸ್ಯವೆಂಥದು!”
ಎನುತಲೆನ್ನ ಬುದ್ಧಿಯನ್ನೆ ಗಾಳಿಯೊಳಗೆ ತೂರುತ
ಇದಾವ ಶಕ್ತಿಯಿಂತು ನನ್ನ
ನಿನ್ನೆಡೆಗೆ ಸೆಳೆವುದು?
ಇದೇಕೆ ನಿನ್ನ ಕಂಡರಿಂತು
ದುಡಿಯೊಲೆದೆಯು ಬಡಿವುದು?
ಮಧುರ ದುಃಖ ಸುಳಿವುದು?
ಇದೆಕೊ ನೋಡು! ಈ ಹೆಣ್ಣು! ಕಡೆದ ಬೊಂಬೆಯೇ ಸರಿ!
ಇಂಥ ಕಣ್ಣು ಮೂಗು, ತುಟಿಯು!- ಚೆಲುವಿಗು ಸಹ ಅಚ್ಚರಿ!
ಆದರೇಕೊ ನನ್ನನಿವಳ ದೇಹ ಸೆಳೆಯಲೊಲ್ಲದು!
ನಿನ್ನಲಿರುವಪೂರ್ವ ಜೀನಕಳೆಯೆ ಇಲ್ಲಿ ಕಾಣದು!
ನಗಲಿ ಜಗ, ಮುರಿದು ಮೊಗ
ತಿರೆಯೆಲ್ಲವು ‘ಗಿಡ್ಡಿ’ ಯೆಂದಸಡ್ಡೆಗೈವ ನಿನ್ನೆಡೆ
ಇದಾವ ಶಕ್ತಿಯಿಂತು ನನ್ನ
ನೊಂದೆಸಮನೆ ಸೆಳೆವುದು?
ಇದೇಕೆ ನಿನ್ನ ಕಂಡರಿಂತು
ದುಡಿಯೊಲೆದೆಯು ಬಡಿವುದು?
ಮಧುರ ದುಃಖ ಸುಳಿವುದು?
*****
