ದೇವರ ಕರುಣೆ

ಸುಖಪಡುವ ಕಾಲದಲಿ ನಿದ್ರೆಯಾತಕೊ ಗೆಳೆಯ
ನಿನ್ನ ಗೆಳತಿಯ ಮರೆತು ಯಾಕೆ ಹೋದೆ
ಬೇಲಿ ಬನಗಳ ಆಚೆ ನೂರು ಕೆರೆಗಳ ಆಚೆ
ಅಡಗಿರುವ ಸುಂದರಿಯ ಯಾಕೆ ಮರೆತೆ

ಓ ಗೆಳೆಯ ಬಾ ಇಲ್ಲಿ ಈ ಮಳೆಯ ನಾಡಿನಲಿ
ಆ ಹಳೆಯ ಜಂಗುಗಳ ನೀ ತೊಳೆದು ಬಾ
ಈ ಹಸಿರ ಹೊಳೆಯಲ್ಲಿ ಈ ಹೂವು ಗಾಳಿಯಲಿ
ಈ ಸುಖದ ಸೆರೆಯಲ್ಲಿ ನೀ ಉಳಿದು ಬಾ

ನಂಬು ಇಲ್ಲಿದೆ ಬೆಲ್ಲ ತುಂಬಿ ಹೋಗಿದೆ ಗಲ್ಲ
ಹಾಡು ಹಕ್ಕಿಯ ಬಿಂಕ ತೇರು ನೋಡು
ಚಳಿಯುಂಡ ಬಿಸಿಲಲ್ಲಿ ಬಿಸಿಲುಂಡ ಗಾಳಿಯಲಿ
ನಿನ್ನ ತೊಟ್ಟಿಲ ನೀನು ತೂಗಿ ನೋಡು

ಈ ಬಿಸಿಲು ಬಿಸಿಲಲ್ಲ ಈ ಚಳಿಯು ಚಳಿಯಲ್ಲ
ಯಾವ ಜನುಮದ ಪುಣ್ಯ ಅಳೆದು ನೋಡು
ರಾತ್ರಿ ಚುಕ್ಕಿಯ ಹಗಲು ಹಕ್ಕಿಯ ಯಾತ್ರಿ
ಯಾವ ದೇವರ ಕರುಣೆ ತಿಳಿದು ನೋಡು
*****