ಯೋಗ
ಉಸಿರು ಉಸಿರಿಗೆ ಶಿವನ ನೆನಹು ನಿಂದಿರಲಣ್ಣ
ಸಹಜಯೋಗವೆ ಯೋಗ ರಾಜಯೋಗ
ಮಾಡೂವ ಕೈ ಕೆಲಸ ನೆನಪಿನಾಟವ ಮಾಡು
ಕರ್‍ಮಯೋಗವೆ ಯೋಗ ಮುದ್ದುಕಂದ
ಸಂಸಾರ
ಸಂಸಾರವೆಂಬುವದು ಕೊಳಚೆ ಕಿಲ್ಪಿಷವಲ್ಲ
ಸಂಸಾರ ಸುಂದರದ ದ್ರಾಕ್ಷಿತೋಟ
ಹೂವು ಹಣ್ಣಿನ ತೋಟ ಮಾವು ಗಿಳಿಗಳ ತೋಟ
ಬದುಕು ಜೀವನ ಯೋಗ ಮುದ್ದುಕಂದ
ಪುರುಷಾರ್‍ಥ
ಕಳೆದದ್ದು ನಾಟಕವು ಸತ್ತದ್ದು ಬಯಲಾಟ
ಬಯಲ ಯುದ್ಧವು ಈಗ ಬಂತು ಬಂತು
ಪುರುಷಾರ್‍ಥವೇ ಸತ್ಯ ಕಾಯಕವೆ ಕೈವಲ್ಯ
ಸನ್ನೇಸಿ ನೀನಲ್ಲ ಮುದ್ದುಕಂದ
ಆಹಾರ
ಬಿಸಿರೊಟ್ಟಿ ಕಾರಬ್ಯಾಳಿ ಮೆಣಸಿಂಡಿ ಹೋಗ್ಯಾವ
ಸ್ಯಾಂಡ್ವಿಚ್ಚು ಬರ್‍ಗರು ನುಗ್ಗಿ ಬಂದ್ವು
ಹತ್ತು ಹೇರಿನ ಜ್ವಾಳಾ ಹೊತ್ತು ಒಗೆಯುವ ಹುಡುಗ
ಬೇಲ್ಪೂರಿ ಚಾಕುಡದ ಮುದ್ದುಕಂದ
*****
