ದೇವರ ಕಾಣಲು ಹೋದವರಿದ್ದಾರೆ ಕಾಡುಬೆಟ್ಟಗಳ ಹಾದು
ಕಾಡ ಕಾಣಲಿಲ್ಲ ಬೆಟ್ಟವ ಕಾಣಲಿಲ್ಲ
ದೇವರ ಕಾಣಲಿಲ್ಲ
ಮರವ ಕಾಣದೆ ಕಾಡ ಕಾಣುವುದು
ಬಯಲ ಕಾಣದೆ ಬೆಟ್ಟವ ಕಾಣುವುದು
ಎಂತೊ ಮನುಷ್ಯ
ಮನುಷ್ಯರ ಕಾಣದ ದೇವರ ಕಾಣುವುದು?
ಪಾಪವ ನೀಗಲು ಹೋದವರಿದ್ದಾರೆ ಪುಣ್ಯ ಕ್ಷೇತ್ರಗಳಿಗೆ
ಅರ್ಘ್ಯ ನೀಡಿದರು ಕಾಸು ನೀಡಿದರು
ಪಾಪ ನೀಗಲಿಲ್ಲ
ಅಹಂಕಾರ ನೀಗದೆ ಮಮಕಾರ ಗಳಿಸುವುದು
ಸ್ವಾರ್ಥ ನೀಗದೆ ಪ್ರೀತಿ ಗಳಿಸುವುದು
ಎಂತೊ ಮನುಷ್ಯ
ಪಾಪ ನೀಗದೆ ಪುಣ್ಯವ ಗಳಿಸುವುದು ?
ಅರಿವು ಗಳಿಸಲು ಹೋದವರಿದ್ದಾರೆ ದೇಶವಿದೇಶಗಳಿಗೆ
ಊರು ಸುತ್ತಿದರು ಮೇರು ಹತ್ತಿದರು
ಅರಿವು ಲಭಿಸಲಿಲ್ಲ
ಹುಟ್ಟೂರು ಕೇರಿಗಳನೆ ಸುತ್ತದವರು ಎಲ್ಲಿ ಹೋದರೆ ಏನು
ಕಾಯಕವಿಲ್ಲದೆ ಕೈಲಾಸ ಎಟುಕುವುದು
ಎಂತೊ ಮನುಷ್ಯ
ಸ್ಥಾವರ ಮರೆತವ ಜಂಗಮನಾಗುವುದು?
*****
