ಗಲ್ಲಕ್ಕೆ ಕೈಹೊತ್ತು ಕೂತರೆ ಬುದ್ಧನಂತೆ
ತಲೆಯಲಿದ್ದುದು ಪೆನ್ನಿಗೆ ಇಳಿದು
ಕಾಗದದ ಮೇಲೆ ಮೂಡುವದಿಲ್ಲ.
ವಿಕ್ಷೇಪ…
ಅನುಕರಣೆಯ ಅಂಟುರೋಗ
ಅಸ್ತವ್ಯಸ್ತ ಮನದ ಒಡಕು
ವಿಚಾರ ಭಾವಗಳ ತೊಡಕು
ವ್ಯಥಾ ಕಾಲಕ್ಷೇಪ…!
ಚಪಲ…
ಇಲ್ಲದುದ ಬೇಕೆಂಬ
ಹುಂಬತನ.
ಮುಖದ ಮೇಲೆ ಕಳೆಯಿಲ್ಲ
ಕಣ್ಣಿನಲಿ ಹೊಳಪಿಲ್ಲ….. ಕಪ್ಪು ವರ್ತುಲ
ಕೂದಲು ತುಂಬಿದ ಗಲ್ಲ.
ಕತ್ತು; ನೀನು ಜಾತಿ ಹಿಪ್ಪಿ ಅಲ್ಲ…..
ಆ ಹೆಣ್ಣಿನ ಅಗಲವಾದ ಬರಿದು ಸೊಂಟವ
ನೋಡಿ ಕಣ್ಣಿನ ಹಸಿವ ತಣಿಸು
ಪರೀಕ್ಷೆ ಬರೆವ ತಲೆ ನಿನಗಿಲ್ಲ
ವಿದ್ಯೆ ನಿನ್ನ ಸೊತ್ತಲ್ಲ….
ಕಾಗದದ ಮೇಲೆ ಪೆನ್ನಿನ ಮಸಿ ಬೀಳುವುದು
ಅಲ್ಲ ವಿಚಾರ ವಸ್ತು
ಅದು ತಲೆಯೊಳಗಿನ ಕಸರತ್ತು.
*****
