ಕಟ್ಟುವೆವು ನಾವು

ಕಟ್ಟುವೆವು ನಾವು
ಬಾಹ್ಯ ಬಲು ಸುಂದರ ಮನೆಗಳ
ಸಾವಿರವರುಷ ಬದುಕುವವೆಂಬ ಭ್ರಮೆಯಲಿ|
ಕಲ್ಲು, ಕಬ್ಬಿಣ ಸಿಮೆಂಟಲಿ
ತ್ಯಾಗ ಹೊನ್ನೆ ಬೀಟೆಮರದ ಬಾಗಿಲಲಿ||

ಬಹು ಅಂತಸ್ತಿನ ಮನೆ
ಬಾರೀ ಬೆಲೆಬಾಳುವ ಮನೆ|
ವೈಕುಂಠದಂತಹ ಬಾಗಿಲು
ಹತ್ತು ಕೊಠಡಿಯ ನೂರಾರು
ಚದುರಡಿ ಮನೆ|
ದೇವರಿಗೊಂದು ಕೋಣೆ‌ಇಲ್ಲ
ತೂಗುಯ್ಯಾಲೆ ವರಾಂಡ
ಮೇಲತ್ತಲು ಮರದ ಮೆಟ್ಟಿಲ ಏಣಿ|
ಬೇರೆ ಯಾವ ಅಥಿತಿಗೂ ಅದರಲಿ
ಉಳಿಯಲು ಅವಕಾಶವಿಲ್ಲ
ಇತರರು ಬರಿ ಹುಬ್ಬೇರಿಸಿ ನೋಡಲಿಕ್ಕೆ||

ಬರೀ ತನ್ನ ಹೆಂಡತಿ ಮಕ್ಕಳ ಸ್ವಾರ್ಥ
ಒಣ ಶ್ರೀಮಂತಿಕೆ ತೋರಿಕೆಗೆ|
ಮೈತುಂಬ ಸಾಲಮಾಡಿ
ನೆಮ್ಮದಿ ಇರದ ಇರುಳಲಿ
ಸುಪ್ಪತ್ತಿಗೆಯ ಮಂಚದಲಿ
ನಿದ್ದೆ ಇರದಲೆ ಹೊರಳಾಡಿ|
ಬಿರುದಿಗೆ ಕತ್ತಿಯ ನುಂಗುವ ಬಗೆ
ಐಷಾರಾಮಿ ಜೀವನದ ಹುಸಿನಗೆ||

ಮುಪ್ಪಾಗಿಹ ತಂದೆ ತಾಯಂದಿರ
ಹಳೆಯ ಮನೆಯಲ್ಲೋ ಅಥವಾ ಇನ್ನಾವುದೋ
ವೃದ್ಧಾಶ್ರಮದಲಿ ಕೂಲಿ ಕೊಟ್ಟಿಟ್ಟು|
ಒಡಹುಟ್ಟಿದವರನು ಮನೆಬಾಗಿಲಿಗೆ
ಬಾರದಂತೆ ನಿಂದಿಸಿ ದೂರಿಟ್ಟು|
ಸ್ನೇಹ ಪ್ರೀತಿ ಪ್ರೇಮದ ಅಡಿಪಾಯವಿಲ್ಲದಲೇ||
*****