ಹೆಣ್ಣಿರದ ಬಾಳು ಬಾಳೇ
ಬಣಗುಡುತ್ತಿದೆ ಬದುಕು
ಬೆಳಕು, ಬಿನ್ನಾಣ, ಶೃಂಗಾರವಿಲ್ಲದಲೆ|
ಒಂಟಿತನದಲಿ ಅದೇನು ಸುಖವಿದೆಯೋ ಕಾಣೆ!
ಗಂಡಿನ ಈ ಒಣ ಹರಟೆಗೆಲ್ಲಿದೆ ಮಾನ್ಯತೆಯು||
ಹೆಣ್ಣಿರದ ಮನೆಯು
ದೀಪವಿಲ್ಲದ ಗುಡಿಯಂತೆ,
ಗೃಹಿಣಿ ಇಲ್ಲದ ಮನೆಯು
ಕಳಸವಿಲ್ಲದ ಗೋಪುರದಂತೆ,
ಹೆಣ್ಣಿರದ ಬಾಳು
ಕೈಗಳಿಲ್ಲದ ಗಡಿಯಾರ ನಡೆದಂತೆ||
ಒಲಿದ ಹೆಣ್ಣಿನ ಚೆಲುವು ಒಲವ
ಸಂಗ ಸಹವಾಸವಿಲ್ಲದಲೆ
ಸಂಸಾರ ಜರಿಯುವುದು ತರವಲ್ಲ|
ಅವಳೊಲವ ಸವಿ ಜೇನ
ಸಿಹಿ ಮಧುವ ಸವಿಯದಲೇ
ದೂರುವುದು ಸರಿಯಲ್ಲ|
ಹೆಣ್ಣಿನ ಸಹನೆ ಸುಗುಣ
ಸಂಯಮಶೀಲತೆಗೆ ಮಿತಿಯಿಲ್ಲ
ಹೆಣ್ಣು ಸಂಸಾರದ
ಕಣ್ಣೆಂದರು ತಿಳಿದವರು|
ಸಾಕು ಈ ಬ್ರಹ್ಮಚಾರಿಯ ನಾಟಕೀಯತೆ
ಕೈತುಂಬಾ ದುಡಿದು ಸಂಸಾರ ರಥ ಸೇರು||
*****
