ಏನೇ ಬಂದರೂ ನೀ ದಯೆತೋರು
ನಿನ್ನಾ ದಯೆಯಲಿ ಬಾಳನು ನೀಡು |
ಬಾನಿಗೆ ರವಿಕಾಂತಿ ಶೋಭಿಸುವಂತೆ
ನನ್ನೀ ಬಾಳಿಗೆ ನೀ ಬೆಳಕಾಗು||ಕೃಷ್ಣಾ||
ಕಷ್ಟವೇ ಬರಲಿ, ಬದುಕಲಿ
ಕಾಳಿರುಳ ಕತ್ತಲೆ ಕವಿಯಲಿ|
ನಿನ್ನಾಕರುಣೆಯ ಕಿಡಿಯೊಂದಿರಲಿ
ಎದುರಿಸಿ ಜಯಿಸುವೆ ಕಠಿಣ ಸಂಕೋಲೆ||
ನಿಂತ ನೆಲವೆ ಕುಸಿಯಲಿ
ಜೀವವಿದು ಪಾತಾಳವನೇ ಸೇರಲಿ|
ನಿನ್ನಾಕರುಣೆಯ ಕರೆಯದು ಕೇಳೆ
ಜ್ವಾಲಾಮುಖಿಯಂತೆ ನೆಲಸೀಳಿ ಬರುವೆ||
ಬರವೇ ಬರಲಿ ಕ್ಷಾಮವೇ ಇರಲಿ
ಭೀಕರ ರೋಗವೇ ಬಳಲಿಸಿ ಬೇಯಿಸಲಿ|
ನಿನ್ನಾ ಅಭಯವು ಅರಳಿದ ಮರುಕ್ಷಣ
ನಾನುದ್ಭವಿಸುವೆ ಶಿಲ್ಪಕಲಾಮೂರ್ತಿಯಂತೆ
ಹೊಳೆಯುತಲಿ ಕಣಕಣ||
*****