ಕ್ರಿಮಿನಲ್ಲು ನನಕಣ್ಣು ಸಿವಿಲ್ಲು ಮಾಡಯ್ಯ

ಕ್ರಿಮಿನಲ್ಲು ನನಕಣ್ಣು ಸಿವಿಲ್ಲು ಮಾಡಯ್ಯ
ಶಿವಬಲ್ಲ ಸಿಹಿಬೆಲ್ಲ ಆಗಬೇಕು
ಕೆನೆಬೆಲ್ಲ ಕೊಬ್ಬರಿಯ ಎದೆಯನ್ನು ನೀಡಯ್ಯ
ರಾವಣನ ರಂಬಾಟ ನಿಲ್ಲಬೇಕು

ಕರಿಯ ಬೆಕ್ಕಿನ ಕಣ್ಣು ಗಿಡದ ಮಂಗನ ಕಣ್ಣು
ಬೇಲಿಮುಂಗಲಿ ಕಣ್ಣು ನಿಲ್ಲಬೇಕು.
ಓ ಅಕ್ಕ ಓ ತಾಯಿ ನನ್ನವ್ವ ನನದೇವಿ
ತಾಯಿಯೆಂಬುವ ಬೆಳಗು ತುಂಬಬೇಕು

ಕಣ್ಣೊಳಗ ಶಿವತುಂಬಿ ಮಳೆತುಂಬಿ ಹೊಳೆತುಂಬಿ
ಹರಹರಾ ಹರನೆಂಬ ಹಾಡುಬರಲಿ
ಕಣ್ಣು ಕವಳಿಯ ಹಣ್ಣು ರುಚಿಯ ನಿಂಬೆಯ ಹಣ್ಣು
ಶಾಂತಿಸಾಗರ ಸುರಿದು ತುಂಬಿ ಬರಲಿ

ಎದಿಯೊಳಗ ಶಿವಲಿಂಗ ನಿಜಲಿಂಗ ಚಿಲ್ಲಿಂಗ
ತಲಿಯೊಳಗ ಘನಲಿಂಗ ತೂಗಾಡಲಿ
ಓ ಅಯ್ಯ ಅಪ್ಪಯ್ಯ ಚನ್ನಯ್ಯ ಚಲುವಯ್ಯ
ಪಂಚಲಿಂಗೇಶ್ವರನೆ ಕುಣಿದಾಡಲಿ.