ತಾರನಾಕದ ಚೌಕದಲಿ ನಿಂತು
ತಾರೆಗಳನೆಣಿಸಲಾರೆವು ನಾವು
ಒಂದೆಡೆ ಮೌಲಾಆಲಿ ಬೆಟ್ಟ
ಇನ್ನೊಂದೆಡೆ ಯಾದ್ಗಿರಿ ಗುಟ್ಟ
ಇವುಗಳ ನಡುವೆ ಆರಿಸಬೇಕೆಂದರೆ
ಅದು ನಿಜಕ್ಕೂ ಕಷ್ಟ
ಬನ್ನಿ, ಕುಳಿತು ಕುಡಿಯುತ್ತ
ಮಿರ್ಚಿಭಜಿ ಕಡಿಯುತ್ತ
ಸಮಸ್ಯೆಯ ಬಿಡಿಸಿ
ಇದು ಇನ್ನೊಂದು ರೀತಿ
ಎಂದು ಕರೆಯುತ್ತದೆ ಕಳ್ಳಿನಂಗಡಿ
ಇಲ್ಲಿ ಹಾಡುಹಗಲೇ ಇರುಳು
ತಾರೆಗಳ ಬದಲು ಮಿಣುಕುವ
ಕ್ಷೀಣಕಾ೦ತಿಯ ಬಲ್ಬುಗಳು
ಎಣಿಸುವುದಕ್ಕೆ ಸುಲಭ
ಅದರೇಕೆ ಕಣ್ಣಿನಲಿ ಈ ಒಸರು?
ಇದರ ಕಾರಣ ಮೆಣಸಿನ ಖಾರವೊ?
ಅಥವ ಇನ್ನೂ ಮಾತಿಗೆ ಬರದ
ನಮ್ಮ ಅಂತಿಮ ನಿರ್ಧಾರವೊ?
*****