ಸೆರಗು

ಅದೇ ಮೊದಲನೆಯ ಸಲ
ಸೀರೆ ಉಟ್ಟು ಮಾಂಗಲ್ಯಕಟ್ಟಿಸಿಕೊಂಡ
ಹುಡುಗಿ-
ಮದುವೆ ಮುಗಿಸಿ ಬಿಟ್ಟುಹೊರಡುವ
ತಂದೆತಾಯಿಯರ ಅಗಲಿಕೆಯ ನೋವಿಗೆ
ಅರಿಯದೇ ಕಣ್ಣೀರು ತುಂಬಿದ್ದು
ಬಿಕ್ಕುತ್ತ ಸೆರಗಂಚಿನಿಂದ
ಕಣ್ಣೊರಸಿಕೊಳ್ಳುವ ಮದುವಣಗಿತ್ತಿ-

ಕಂಪ್ಯೂಟರ್ ಮೇಲೆ ಕೈಚಳಕವಾಡಿಸಿ
ಹಾಯ್ ಸುಜಿ, ಬಾಯ್ ಕೃಷ್ಣಕಾಂತ್
ಹೇಳಿ-ಟೈಟ್‌ಪ್ಯಾಂಟ್ ಪಾಕೇಟಿನಿಂದ
ಕಾರ್ ಕೀ ತೆಗೆದು ಓಡಿಸಿ ನಗುವ
ಹುಡುಗಿ-
ಮಸಾಲೆ ಈರುಳ್ಳಿ ಕಣ್ಣಿಗೆ ಹೋಗಿದ್ದಕ್ಕೆ
ಪಾತ್ರೆತಿಕ್ಕಿ ಬಚ್ಚಲು ತೊಳೆದದ್ದಕ್ಕೆ
ಮಿಕ್ಸರ್ ಸುರುಮಾಡಿ
ತವರು ಮನೆ ನೆನೆದು ಬಿಕ್ಕುತ್ತ
ಸೆರಗಂಚಿನಿಂದ ಕಣ್ಣೊರಸಿಕೊಳ್ಳುವ ಗೃಹಿಣಿ ಪಾತ್ರ-

ಬೆಡ್‌ರೂಂ ಸ್ಟಡೀ ಟೆಬಲ್ ತುಂಬೆಲ್ಲ
ಶಾರೂಕ್ ಹೃತಿಕರ ಪೋಸ್ಟರಹಚ್ಚಿ
ದುಪಟ್ಟಹಾರಿಸಿ ಕಣ್ಣುಹೊಡೆದು ಮುತ್ತಿಸುವ
ಪರೀಕ್ಷೆ ತಪ್ಪಿಸಿ ಅಯಸ್ಕ್ರೀಮ್ ತಿನ್ನುವ
ಹುಡುಗಿ-

ಮಗುವಿನ ತಾಯಿಯಾಗಿ
ಮನೆ ತುಂಬ ಫೋಟೋ ಹಚ್ಚಿಕೊಂಡದ್ದು
ವಾಶಿಂಗ್ ಮಶೀನ್‌ಗೆ ಬಟ್ಟೆತುಂಬುತ
ಏಪ್ರನ್ ಹಾಕಿಕೊಂಡು ಪಾತ್ರೆತೊಳೆಯುತ
ಅಳುವ ಮಗುವಿಗೆ ಸೆರಗಂಚಿನಿಂದ
ಕಣ್ಣೀರು ಸುಂಬಳ ಮುಸುರೆಬಾಯಿ ಒರೆಸುವ ಅಮ್ಮ.
*****